प्रमोद देठे – मोबाईल हॅकिंग, बनावट अॅप्स आणि लबाडीने ओटीपी मिळवून Flipkart द्वारे लाखो रुपयांची ऑनलाइन फसवणूक करणाऱ्या आंतरराज्यीय टोळीचा भांडाफोड करत भाईंदर पोलिसांनी तब्बल ५० लाख ५८ हजार रुपयांचा मुद्देमाल जप्त केला आहे. या प्रकरणात आत्तापर्यंत सात आरोपींना अटक करण्यात आली असून, विविध राज्यांतून ही कारवाई करण्यात आली आहे.
सदर गुन्हा गंभीर स्वरूपाचा, क्लिष्ट आणि व्याप्तीने विस्तृत असल्याने पोलीस उपायुक्त राहुल चव्हाण यांच्या मार्गदर्शनाखाली तपास सुरू करण्यात आला होता.
टोळीतील आरोपी नागरिकांना CRED.apk, MParivahan Fake UI.apk, Adult Chat.apk यांसारख्या बनावट अॅप्सच्या लिंक पाठवत. त्या क्लिक करताच संबंधित मोबाईल हॅक केला जात असे. त्यानंतर Call forwarding, SMS access, UPI Pin, Gmail login, Contact List अशा गोष्टींवर नियंत्रण मिळवून OTP हस्तगत केला जात असे. हे OTP वापरून फ्लिपकार्टवरून महागडे मोबाईल खरेदी केले जात आणि नंतर ते मोबाईल इतर लोकांना विकून पैसे कमावले जात. आत्तापर्यंत आरोपींकडून iPhone, Google Pixel, Samsung, Vivo, Nothing, Poco, Realme, Motorola अशा नामांकित कंपन्यांचे १०७ स्मार्टफोन आणि ४ लाख रुपये रोख असा एकूण ५०,५८,४६७/- रुपयांचा मुद्देमाल जप्त करण्यात आला आहे.
(१) रिकुकुमार श्रीरामजीलाल बैरवा (जाटव) वय २९, जि. अलवर, राज्य राजस्थान, (२) कौस्तुभ प्रकाश जाधव, वय २१ वर्ष , ऐरोली, नयी मुंबई, (३) मित अरविंद भानुशाली, वय २२ वर्ष, रा. भाईदर पश्चिम, (४) पुष्पेन्दर गणेशप्रसाद कुमार, २६ वर्षे , पन्ना, मध्यप्रदेश (५) देव रामदास यादव, वय २३ वर्ष, उत्तर पूर्व, दिल्ली, (६) रमीझ एहतेशाम शेख , टबसेरा बिल्डींग खाडी, भिवंडी, ता.जि. ठाणे, अशा आरोपीतांना अटक करण्यात आली होती. मुख्य आरोपी हार्डी ऊर्फ प्रिन्स कमलेश राजनाणी, वय २० वर्ष, रा. चक्करभाटा, जि. बिलासपुर, राज्य छत्तीसगढ़ हा मिळून आला नव्हता, गुन्हयामध्ये नमुद आरोपी्स अटक करणे महत्त्वाचे असल्याने नमुद आरोपीताचे मोबाईल फोनचे तांत्रीक विश्लेषण करून, त्याआधारे सपोनि माणिकराव कतुरे, पोहवा सुशिल पवार, पोअं. राहुल काटकर यांचे पोलीस पथक नमुद आरोपीताचे शोधाकरीता छत्तीसगड येथे पाठविले होते, तेथे यशस्वी सापळा रचून, नमुद आरोपीतास दिनांक ०६/१०/२०२५ रोजी अटक करण्यात आले.भाईंदर पोलीस स्टेशनचे वरिष्ठ पोलीस निरीक्षक जितेंद्र कांबळे, गुन्हे निरीक्षक महेंद्र निंबाळकर, सपोनि माणिकराव कतुरे, संजय शिंपणे, पोलीस अंमलदार रविंद्र वाघ, सतीष सरनाईक, राहुल काटकर, सुशिल पवार, तसेच इतर पोलीस कर्मचाऱ्यांनी विविध राज्यांत जाऊन यशस्वी कारवाई केली.
ही टोळी देशभरात कार्यरत असून, अधिक संशयितांचा शोध सुरू आहे. नागरिकांनी कोणत्याही अनोळखी लिंकवर क्लिक करू नये व OTP कोणालाही देऊ नये, असा इशारा पोलिसांनी दिला आहे. ही कारवाई मिरा-भाईंदर, वसई-विरार पोलीस आयुक्तालयाचे आयुक्त निकेत कौशिक, अप्पर पोलीस आयुक्त दत्तात्रय शिंदे यांच्या देखरेखीखाली पार पडली.