मीरा-भाईंदर – भाईंदर पश्चिम येथील शास्त्रीनगर झोपडपट्टीतील नागरिकांना भेडसावत असलेल्या मूलभूत नागरी समस्या लक्षात घेऊन, ॲड. रवी व्यास यांनी प्रत्यक्ष भेट देत परिस्थितीची पाहणी केली.
यावेळी त्यांनी स्थानिक नागरिकांशी संवाद साधून सार्वजनिक शौचालयांची दुरवस्था, पाणीटंचाई, अस्वच्छता अशा महत्त्वाच्या तक्रारी ऐकून घेतल्या. भेटीदरम्यान उपायुक्त सचिन बांगर, तसेच सार्वजनिक बांधकाम, पाणीपुरवठा आणि आरोग्य विभागाचे कनिष्ठ अभियंते उपस्थित होते. ॲड. व्यास यांनी अधिकाऱ्यांना तातडीने व प्रभावी कारवाई करण्याचे स्पष्ट निर्देश दिले.
व्यास म्हणाले,”स्वच्छता, पिण्याचे पाणी आणि स्वच्छ शौचालय ही प्रत्येक नागरिकाची मूलभूत गरज व हक्क आहे. मी प्रशासनाला त्वरित उपाययोजनां करण्याची मागणी केली असून , या कामांची प्रगती मी वैयक्तिकरित्या तपासणार आहे.”
शास्त्रीनगर परिसरातील नागरिकांनी ॲड. रवी व्यास यांच्या तातडीच्या दौऱ्याचे स्वागत केले असून, प्रशासनाने आता ठोस कृती करावी, अशी त्यांची मागणी आहे.
