नवी मुंबई – पंतप्रधान नरेंद्र मोदी यांच्या हस्ते नवी मुंबई आंतरराष्ट्रीय विमानतळाच्या पहिल्या टप्प्याचे उद्घाटन, मुंबई मेट्रो लाईन-३ च्या आचार्य अत्रे चौक ते कफ परेड या अंतिम टप्प्याचे राष्ट्राला अर्पण तसेच ‘मुंबई वन’ या देशातील पहिल्या एकात्मिक कॉमन मोबिलिटी अॅपचा शुभारंभ झाला. यासोबतच राज्यातील ४१९ आयटीआय आणि १४१ तांत्रिक संस्थांमध्ये २ हजार ५०६ बॅचेसच्या माध्यमातून नवीन अल्पमुदतीच्या रोजगारक्षम अभ्यासक्रमांचाही प्रारंभ झाला.
नवी मुंबई आंतरराष्ट्रीय विमानतळ प्रांगणात झालेल्या या भव्य कार्यक्रमाला अनेक मान्यवर उपस्थित होते. या प्रसंगी राज्यपाल आचार्य देवव्रत, मुख्यमंत्री देवेंद्र फडणवीस, उपमुख्यमंत्री एकनाथ शिंदे, अजित पवार, केंद्रीय नागरी उड्डाण मंत्री किंजरापू राममोहन नायडू, केंद्रीय राज्यमंत्री मुरलीधर मोहोळ, केंद्रीय सामाजिक न्याय राज्यमंत्री रामदास आठवले, विधानसभा अध्यक्ष ॲड. राहुल नार्वेकर, जपानचे भारतातील राजदूत ओनू केईची, वन मंत्री गणेश नाईक, सांस्कृतिक कार्य मंत्री ॲड. आशिष शेलार, कौशल्य, रोजगार व नाविन्यता मंत्री मंगल प्रभात लोढा, महिला व बालविकास मंत्री आदिती तटकरे, परिवहन मंत्री प्रताप सरनाईक यांच्यासह अनेक खासदार, आमदार आणि अदानी ग्रुपचे चेअरमन गौतम अदानी उपस्थित होते.
या लोकार्पण सोहळ्यामुळे मुंबई व उपनगरातील वाहतूक व्यवस्थेतील महत्त्वाचे प्रकल्प अधिक सक्षम होत असून, रोजगार व संधींचे नवे क्षितिज खुले झाले आहे. विशेषतः ‘मुंबई वन’ अ‍ॅपच्या माध्यमातून प्रवाशांना सर्व सार्वजनिक वाहतुकीचा एकत्रित अनुभव घेता येणार आहे.
मुंबई आणि परिसराच्या सर्वांगीण विकासाच्या दृष्टिकोनातून हा ऐतिहासिक दिवस ठरला आहे.