मिरा-भाईंदर – महाराष्ट्राच्या भक्तीपरंपरेचा केंद्रबिंदू, भक्तांच्या भावविश्वातील आधारस्तंभ, समतेचा आणि सामाजिक ऐक्याचा मार्गदर्शक असा आपल्या हृदयात वसलेला विठूमाऊलींचा दिव्य स्पर्श आज मिरा-भाईंदर शहराने प्रत्यक्ष अनुभवला.महाराष्ट्र राज्य परिवहन मंत्री तथा धाराशिव जिल्हा पालकमंत्री आणि मिरा-भाईंदरचे लोकप्रिय लोकनेते प्रताप इंदिराबाई बाबुराव सरनाईक यांच्या दृढ संकल्पनेतून साकारलेल्या ५१ फुटी श्री विठ्ठलाच्या विराट, भव्य आणि कालयुगातील अद्वितीय मूर्तीचे अनावरण नवघर तलाव, भाईंदर (पूर्व) येथे अतुलनीय भक्तिभावात, हरिनामाच्या गजरात आणि अपार श्रद्धेने पार पडले.
मीरा-भाईंदरच्या सांस्कृतिक, आध्यात्मिक आणि सामाजिक इतिहासात सुवर्णाक्षरांनी कोरला जाणारा हा दिवस नगरविकासाच्या नव्या अध्यायाचा आरंभ ठरला आहे. विकासाचा वेग आणि अध्यात्माचा स्पर्श यांचे सुंदर संतुलन साधणाऱ्या मंत्री सरनाईक यांच्या कार्यसंस्कृतीतून शहराला फक्त पायाभूत सुविधा नाही, तर आत्म्याला उभारी देणारी नवी ओळख मिळाली आहे. वारकरी परंपरेवर आधारित आकर्षक बसथांबे, भव्य वारकरी चौक, सुसज्ज वारकरी भवन आणि आता पंचावन्नगुणा दिव्यतेने झळकणारी ५१ फुटी विठ्ठलाची भव्य मूर्ती हे सर्व प्रकल्प मंत्री सरनाईक यांच्या दूरदृष्टीचे आणि मीरा-भाईंदरला आध्यात्मिक पर्यटनाच्या जागतिक पातळीवरील नकाशावर नेण्याच्या महत्त्वाकांक्षी ध्येयाचे दर्शन घडवतात.
या अभूतपूर्व श्री. विठ्ठल मूर्तीच्या अनावरण सोहळ्याबद्दल बोलताना मंत्री सरनाईक म्हणाले कि, “पंढरीचा विठूराया हा फक्त देव नाही; तो संस्कृती आहे, परंपरा आहे, सर्वांचा सखा-सोबती आहे. त्या विठूमाऊलीचे आशीर्वाद आपल्या शहरावर अखंड रहावेत आणि विकासासोबत अध्यात्म हेही मिरा-भाईंदरचे वैशिष्ट्य बनावे हीच माझी भावना, हीच प्रेरणा घेऊन ठाण्याप्रमाणेच मीरा-भाईंदर शहरात आज ५१ फुट विठ्ठल मूर्ती उभारण्यात आलेली आहे. शहराचा विकास फक्त रस्ते आणि इमारतींमध्ये नसतो; तो लोकांच्या श्रद्धा, संस्कृती आणि आत्म्यात असतो. पंढरपूरच्या विठ्ठलाविषयीची अपार भक्ती आपल्या शहरातही जिवंत रहावी आणि या शहराला विकासासोबतच अध्यात्मिक स्थैर्याची ओळख मिळावी, याच उद्देशाने हा सोहळा मीरा-भाईंदर शहरात राबवण्यात आला. विठूमाऊलीचा हात मीरा-भाईंदरच्या डोक्यावर सदैव राहावा. हीच माझी प्रार्थना, हीच माझी जबाबदारी. मीरा-भाईंदरकरांनी दिलेल्या अभूतपूर्व, उत्स्फूर्त आणि भावनिक प्रतिसादाबद्दल त्यांचे मनःपूर्वक आभार. हजारो नागरिकांच्या उपस्थितीत, टाळ-चिपळ्यांच्या निनादात, हरिनामाच्या गजरात आणि दिव्य रोषणाईत उजळून निघालेला हा सोहळा शहराच्या इतिहासातील अतुलनीय भक्तिमहोत्सव म्हणून कायम स्मरणात राहणार आहे.”