मराठा बिझनेस फोरमच्या माध्यमातून भविष्यात टाटा, बिर्ला, अंबानीही मराठा समाजातून निर्माण होतील; भाजपा गटनेते आ. प्रवीण दरेकरांनी व्यक्त केला विश्वास
मुंबई – आपला निर्धार पक्का असेल तर पैशाची अडचण येत नाही. पैसे आहेत पण ते कसे मिळवायचे याचे मार्गदर्शन करण्यासाठी फोरमची गरज लागते. तो फोरम आपण उभा केलात. या फोरमच्या माध्यमातून उद्या भविष्यात नक्कीच टाटा, बिर्ला आणि अंबानीही मराठा समाजातून निर्माण होतील, असा विश्वास भाजपा गटनेते व महाराष्ट्र गृहनिर्माण स्वयं/समूह पुनर्विकास प्राधिकरणाचे अध्यक्ष आमदार प्रवीण दरेकर यांनी व्यक्त केला. ते वरळीच्या नेहरू सेंटर येथे आयोजित मराठा बिझनेस काँक्लेव्ह सोहळ्यात बोलत होते.
याप्रसंगी उद्योजक व विकासक सुरेश हावरे, अखिल मराठा फेडरेशनचे अध्यक्ष सुरेश सुर्वे, अखिल भारतीय मराठा महासंघाचे अध्यक्ष दिलीप जगताप, मराठा बिझनेस फोरमचे अध्यक्ष अरुण पवार, कार्याध्यक्ष राजेंद्र सावंत, सचिव पंकज घाग, उपाध्यक्ष राजेंद्र घाग, मराठा समन्वयक ऍड. वीरेंद्र पवार यांसह मोठ्या संख्येने मराठा समाजाचे उद्योजक उपस्थित होते.
यावेळी बोलताना आ. दरेकर म्हणाले कि, मराठा समाजाच्या उत्कर्षासाठी चांगला फोरम निर्माण केलाय. या फोरमच्या माध्यमातून उद्योजकांना प्रोत्साहन देण्यासाठी हा कार्यक्रम होत आहे. मराठा समाज, मराठी माणसासाठी आणि त्याला त्याच्या पायावर उभे करण्यासाठी जेजे करावे लागते ते अत्यंत प्रामाणिकपणे मी करत असतो. आपल्या समाजाची माणसे आर्थिकदृष्ट्या सक्षम झाली पाहिजेत. तुमच्याच समाजाचा माणूस एका मोठ्या बँकेचे नेतृत्व करतोय. बँकेची १५ हजार कोटींची उलाढाल असताना माझी माणसेही मोठी झाली पाहिजेत अशा भावनेने काम करत आहे. यावेळी दरेकर यांनी आ. अभिजीत पाटील यांना कारखान्यासाठी आणि पोलादपूरचे चोरगे यांना बिसलेरी प्लांट सुरु करण्यासाठी आर्थिक मदत केल्याचेही सांगितले.
दरेकर पुढे म्हणाले कि, मी नेहमी कल्पकतेने काम करतो. माझ्या अधिकाराचा, सत्तेचा उपयोग सर्वसामान्यांना झाला पाहिजे. लाडक्या बहिणींना सरकारने दीड हजार रुपये दिले. त्या खऱ्या अर्थाने आर्थिक सबळ झाल्या पाहिजेत, त्यांचे पैसे उद्योग-व्यवसायात आले पाहिजेत. यासाठी मुंबई बँकेमार्फत शून्य टक्के व्याज दराने कर्ज धोरण आणले. ५०० महिलांना उद्योगासाठी बिनव्याजी कर्ज दिलेय. या महिलांचे पैसे अर्थव्यवस्थेत येणार असून त्या आर्थिकदृष्ट्या सक्षम होणार आहेत. मुख्यमंत्री देवेंद्र फडणवीस यांचीही कल्पना आहे कि महिलांनी व्यवसाय केला पाहिजे व त्यांचे पैसे अर्थव्यवस्थेत आले पाहिजेत. ते काम मी करत असल्याचेही दरेकर म्हणाले.
*एकमेकांना आत्मविश्वास देण्याचे काम फोरमने करावे*
दरेकर म्हणाले कि, मुंबईत स्वयं पुनर्विकासाच्या माध्यमातून १८ इमारती उभ्या केल्या आहेत. लोकं चाव्या घेऊन मोठ्या घरात राहायलाही गेली आहेत. राज्याच्या मुख्यमंत्र्यांनी यासाठी मला ताकद दिली. मराठी माणसाच्या केवळ गप्पा मारून चालत नाही तर त्यासाठी काम करावे लागते. स्वयं पुनर्विकास योजनेसाठी राज्य सहकारी बँक दीड हजार कोटी आणि एनसीडीसीच्या माध्यमातून एक हजार कोटी रुपये उपलब्ध होणार आहेत. मराठी उद्योजकांनी पैशाची काळजी करू नये. अर्थपूरवठा करणारी यंत्रणा तुमच्या पाठीशी उभी करू. जेणेकरून व्यवसाय ताकदीने पुढे नेता येईल. फोरमने नवउद्योजकांना मार्गदर्शन, प्रशिक्षण देणे, उद्योगाची सुरुवात करून देणे तसेच जे उद्योजक आहेत त्यांना उद्योग वाढीसाठी वेगळी यंत्रणा उभी करावी. एकमेकांना आत्मविश्वास देण्याचे काम करावे, असे आवाहनही दरेकरांनी यावेळी केले.