प्रमोद देठे – मिरा-भाईंदरच्या रस्त्यांची झालेली दुर्दशा, खड्डे आणि खोदकामांचे राजकारण यामुळे अखेर महानगरपालिका आयुक्त राधाबिनोद शर्मा (भा.प्र.से.) स्वतःच रस्त्यावर उतरले. शहरभर सुरू असलेल्या रस्ते दुरुस्ती आणि सिमेंट काँक्रीट कामांची २२ नोव्हेंबर २०२५ रोजी त्यांनी झाडाझडती घेतली आणि संबंधित अधिकाऱ्यांना “कामे वेळेत, नीट आणि दर्जेदार करा—नाहीतर परिणाम भोगायला तयार रहा” असा कडक इशारा देत जागे केले.
शहरातील रस्ते खणून ठेवले, खोदकामे केली पण दुरुस्तीचा मागमूसही नाही—या निष्काळजीपणामुळे नागरिकांची रोजची कोंडी, अपघात आणि त्रास वाढत असल्याची दखल घेत आयुक्तांनी अचानक पाहणी मोहीम राबवली.
खड्डेमय रस्त्यांवर आयुक्तांचा संताप
एस.के. स्टोन, शीतलनगर रोड, सम्राट हॉटेल सर्व्हिस रोड, डेल्टा गार्डन, काशिमीरा, काशिमीरा–गोल्डन नेस्ट, फाटक रोड आदी प्रमुख मार्गांवरील कामांचा त्यांनी आढावा घेतला. काही ठिकाणी कामाचा वेग कासवगतीने असल्याचे दिसताच आयुक्तांनी अधिकाऱ्यांना सडेतोड सुनावले.
३० मीटर रुंदीकरणाचे काम रेंगाळले; तात्काळ गती द्या—आयुक्तांचा आदेश
प्लेजंट पार्क–एमआयडीसी रोडवरील मोठ्या रुंदीकरण प्रकल्पाची पाहणी करताना त्यांनी स्पष्ट शब्दांत सांगितले की — “हे काम आता थांबणार नाही, धडाधड पूर्ण करा!”
पाणीपुरवठा योजनेअंतर्गत करण्यात आलेल्या खोदकामांची दुरुस्ती वेळेवर न केल्याबद्दलही त्यांनी संबंधित विभागाला फैलावर घेतले.
“खड्डे तात्काळ बुजवा, नाहीतर कारवाई टाळता येणार नाही,” असा इशारा देण्यात आला.
अधिकाऱ्यांना स्पष्ट संदेश – निकृष्ट कामे सहन केली जाणार नाहीत
अधिकाऱ्यांना आणि कंत्राटदारांना आयुक्तांनी शेवटचे बजावले—
“रस्ते नागरिकांसाठी आहेत, तुमच्या मर्जीवर नाहीत. गुणवत्तेची काडीची तडजोड चालणार नाही.”
पाहणीदरम्यान शहर अभियंता दिपक खांबित, कार्यकारी अभियंता शरद नानेगावकर, माहिती व जनसंपर्क अधिकारी राज घरत आणि इतर अधिकारी उपस्थित होते.