स्काय हाइट्स प्रकल्पातील धूळप्रदूषण प्रकरणी युवक काँग्रेस आक्रमक; विकासकावर गुन्हा दाखल करून बांधकाम सील करण्याची मागणी

प्रमोद देठे – कनकिया परिसरातील स्काय हाइट्स प्रकल्पातील सुरू असलेल्या बांधकामामुळे गंभीर धूळप्रदूषण होत असून परिसरातील नागरिकांच्या आरोग्याला धोका निर्माण झाला आहे. धूळ नियंत्रणासाठी आवश्यक उपाययोजना न करता बांधकाम सुरु ठेवल्याप्रकरणी संबंधित विकासकाविरोधात गुन्हा दाखल करून बांधकाम तत्काळ सील करण्यात यावे, अशी मागणी युवक काँग्रेसचे ओवळा–माजिवडा विधानसभा अध्यक्ष कुणाल काटकर यांनी महानगरपालिका आयुक्त राधाबिनोद शर्मा व पोलीस आयुक्त निकेत कौशिक यांच्याकडे लेखी तक्रारीद्वारे केली आहे.
स्काय हाइट्स प्रकल्प महानगरपालिका आयुक्तांच्या शासकीय निवासस्थानालगत सुरू असून बांधकामामुळे मोठ्या प्रमाणात धूळ उडत आहे. त्यामुळे परिसरातील नागरिकांना दमा, अस्थमा, एलर्जी, COPD यांसारख्या गंभीर आजारांचा धोका वाढत असल्याचे काटकर यांनी म्हटले आहे.
धूळ नियंत्रणासाठी बांधकामस्थळी २५ फूट उंच तटबंदी, हिरवे कापड, मिस्ट स्प्रे, स्मॉग गन, पाणी फवारणी, साहित्य साठवण झाकून ठेवणे यांसारख्या उपाययोजना करणे बंधनकारक आहे. मात्र स्काय हाइट्स प्रकल्पात यापैकी कोणत्याही नियमांचे पालन केले जात नसल्याचा आरोप युवक काँग्रेसने केला आहे.

काही दिवसांपूर्वी या बांधकामातील प्लास्टरचे साहित्य मनपा आयुक्तांच्या पारिजात बंगल्यात पडल्याने नुकसान झाले होते. त्या प्रकरणी संबंधित विकासकावर गुन्हा दाखल करण्यात आला होता. तरीदेखील बांधकामातील निष्काळजीपणा कायम असल्याचे काटकर यांनी स्पष्ट केले.
धूळप्रदूषणामुळे नागरिकांच्या आरोग्याचा प्रश्न गंभीर होत असल्याने नियम मोडणाऱ्या विकासकाविरोधात तात्काळ कठोर कारवाई करण्याचे आवाहन युवक काँग्रेसने प्रशासनाला केले आहे.

Leave a Reply

Your email address will not be published. Required fields are marked *