मुंबई | दादर येथील शिवाजी पार्क मैदानावर २५ नोव्हेंबर २०२५ रोजी सायं. ४ वाजता भव्य “संविधान सम्मान महासभा” आयोजित करण्यात आली आहे. फुले, शाहू, आंबेडकर विचारांचे अनुयायी तसेच संविधानवादी व सामाजिक न्यायाची जाणीव असलेल्या नागरिकांनी मोठ्या संख्येने उपस्थित राहावे, असे आवाहन आयोजकांनी केले आहे.
“भारताचे संविधान – आमचा अभिमान!” आणि “देश संविधानाने चालेल, मनुवादाने नाही!” या घोषणांसह ही सभा संविधानिक मूल्यांचे संरक्षण, सामाजिक समता, मानवाधिकार आणि लोकशाहीची बाजू अधिक भक्कम करण्यासाठी महत्त्वपूर्ण ठरणार आहे.
संविधानावरील वाढत्या हल्ल्यांच्या पार्श्वभूमीवर जनतेचा आवाज बुलंद करण्यासाठी आणि लोकशाही टिकवण्यासाठी ही सभा एकजुटीचे प्रतीक ठरण्याची शक्यता व्यक्त केली जात आहे.
मुंबईत होणाऱ्या या ऐतिहासिक सभेची उत्सुकता वाढली असून, विविध समाजघटकांकडून यात व्यापक सहभाग अपेक्षित आहे.