मिरा-भाईंदर – मिरा-भाईंदर शहरातील सुशिक्षित बेरोजगार मराठी तरुण-तरुणींना मुंबई मेट्रो ड्रीम लाईन ९ मध्ये रोजगाराच्या संधी उपलब्ध करून देऊन स्थानिकांना प्राधान्य द्यावे, अशी मागणी महाराष्ट्र नवनिर्माण विद्यार्थी सेनेने (मनविसे) केली आहे.या मागणीसंदर्भात मनविसेच्या प्रतिनिधींनी मुंबई मेट्रोच्या व्यवस्थापकीय संचालक रुबल अग्रवाल, महाव्यवस्थापक अजय खानवानी आणि एमएमआरडीए आयुक्त संजय मुखर्जी यांना निवेदन दिले.मनविसेने निवेदनात नमूद केले की, मुंबई मेट्रो लाईन ९ चे काम मिरा-भाईंदर परिसरातून जात असून, या प्रकल्पामुळे मोठ्या प्रमाणावर रोजगारनिर्मितीची संधी निर्माण झाली आहे. मात्र, स्थानिक मराठी तरुणांना त्यात दुय्यम स्थान मिळत असल्याची खंत त्यांनी व्यक्त केली. त्यामुळे मिरा-भाईंदरच्या भूमिपुत्रांना या प्रकल्पात प्रथम प्राधान्य देण्यात यावे, अशी ठाम मागणी करण्यात आली.या निवेदनावेळी मनविसे शहराध्यक्ष रॉबर्ट डिसोझा, उपशहराध्यक्ष स्वप्नील गुरव, विभागाध्यक्ष पवन खन्ना, विभाग सचिव सिद्धेश लाड आणि प्रणय कांबळे उपस्थित होते.
मनविसे पदाधिकाऱ्यांनी प्रशासनाला इशारा दिला की, स्थानिकांना न्याय मिळाला नाही, तर महाराष्ट्र नवनिर्माण विद्यार्थी सेना आंदोलनाचा मार्ग स्वीकारेल.