मुंबई : गृहनिर्माण स्वयं समूह पुनर्विकास योजनेला राष्ट्रवादी काँग्रेसचे अध्यक्ष शरद पवार यांनी सक्रीय पाठिंबा दर्शवला आहे. या योजनेमुळे मध्यमवर्गीय रहिवाशांना विकासकांकडून मिळणाऱ्या घरांपेक्षा अधिक मोठे आणि दर्जेदार घर मिळत असल्याबद्दल त्यांनी समाधान व्यक्त केले.
पवार यांनी महाराष्ट्र गृहनिर्माण स्वयं समूह पुनर्विकास प्राधिकरणाचे अध्यक्ष आमदार प्रवीण दरेकर यांना भेटीला बोलवून या योजनेचा सविस्तर आढावा घेतला. यावेळी त्यांनी स्वयं पुनर्विकास उपक्रमाचे कौतुक करत, “ही योजना खरंच सर्वसामान्य गृहकुलांसाठी आशेचा किरण ठरते आहे,” असे मत व्यक्त केले.
अर्थपुरवठा संदर्भात केंद्र सरकारच्या अर्थ विभागाशी बोलून या योजनेला गती देण्यासाठी सर्वोतोपरी मदत व सहकार्य करण्याचे आश्वासनही पवार यांनी दिले. तसेच, लवकरच यशस्वी प्रकल्पांना भेट देऊन कामकाजाचा प्रत्यक्ष आढावा घेण्याचेही त्यांनी सांगितले.
या बैठकीत स्वयं पुनर्विकास प्रक्रियेतील गती, निधीपुरवठा आणि नागरिकांचा सहभाग याबाबत सविस्तर चर्चा झाली. या प्रसंगी खासदार सुप्रिया सुळे व आमदार प्रसाद लाड उपस्थित होते.पवार यांच्या या पुढाकारामुळे स्वयं पुनर्विकास प्रकल्पांना नवसंजीवनी मिळेल, अशी अपेक्षा व्यक्त केली जात आहे.