नंदुरबार – नंदुरबार जिल्ह्यात आज सकाळी एक हृदयद्रावक घटना घडली. अक्कलकुवा–मोलगी मार्गावरील देवगोई घाटात शालेय विद्यार्थ्यांनी भरलेली बस १०० ते १५० फूट खोल दरीत कोसळल्याने दोन विद्यार्थ्यांचा मृत्यू, तर ३० पेक्षा अधिक विद्यार्थी जखमी झाले आहेत.
दिवाळीच्या सुट्टीनंतर विद्यार्थ्यांना शाळेत परत आणण्यासाठी मेहुनबारे (ता. चाळीसगाव) येथील अनुदानित आश्रमशाळेची बस निघाली होती. बसमध्ये ३५ हून अधिक विद्यार्थी–विद्यार्थिनी, त्यात अनेक लहान मुले होती. घाटातील वळणावर बसचालकाचा ताबा सुटल्याने बस दरीत कोसळली.
अपघातानंतर परिसरात एकच आरडाओरड झाली. स्थानिक ग्रामस्थांनी धाव घेऊन बचावकार्य सुरू केले. अनेक विद्यार्थ्यांना गंभीर दुखापती झाल्या असून, गंभीर जखमींना नंदुरबार जिल्हा रुग्णालयात, तर इतरांना अक्कलकुवा ग्रामीण रुग्णालयात दाखल करण्यात आले आहे.
घटनेची माहिती मिळताच अक्कलकुवा पोलीस व प्रशासनाचे अधिकारी घटनास्थळी दाखल झाले. या भीषण दुर्घटनेमुळे परिसरात शोककळा पसरली असून, नागरिकांमध्ये तीव्र संताप आणि दु:ख व्यक्त होत आहे.
स्थानिक सूत्रांनी दिलेल्या माहितीनुसार, आश्रमशाळेने आज विद्यार्थ्यांना आणण्यासाठी दोन बस पाठवल्या होत्या, त्यापैकी एका बसला हा अपघात झाला. अद्याप अपघाताचे अचूक कारण स्पष्ट झालेले नाही.