मुंबई – राज्य शासनाच्या दिव्यांग कल्याण विभागात दिव्यांग व्यक्तींसाठी अत्याधुनिक एआय-आधारित व्हॉट्सअ‍ॅप चॅटबॉट सेवा (7821922775) कार्यान्वित करण्यात आली आहे. दिव्यांग व्यक्तींसाठी असणाऱ्या शासकीय योजनांची माहिती तसेच तक्रार निवारण व्यवस्था आता ‘एका क्लिकवर’ उपलब्ध होणार आहे.
दिव्यांग व्यक्तींना योजनांची माहिती मिळवताना किंवा तक्रार नोंदविताना येणाऱ्या अडचणी दूर करण्याच्या उद्देशाने ही सेवा सुरू करण्यात आली आहे, अशी माहिती दिव्यांग कल्याण विभागाचे सचिव तुकाराम मुंढे यांनी दिली.
या चॅटबॉटमध्ये ‘भाषिणी’ तंत्रज्ञानावर आधारित व्हॉइस नोटद्वारे तक्रार नोंदविण्याची सुविधा उपलब्ध आहे. टायपिंग करणे शक्य नसलेल्या व्यक्ती आता फक्त आवाज रेकॉर्ड करून मराठी किंवा इंग्रजी भाषेत आपली तक्रार पाठवू शकतात. तसेच या चॅटबॉटमध्ये ‘सेल्फ-ट्रॅकिंग’ सुविधा उपलब्ध असून, नोंदविलेल्या तक्रारीची सद्यस्थिती नागरिकांना थेट व्हॉट्सअ‍ॅपवर पाहता येईल. “दिव्यांगांसाठीच्या योजना सुलभ पद्धतीने पोहोचवणे आणि तंत्रज्ञानाच्या माध्यमातून त्यांचे प्रश्न सोडवणे, हा या उपक्रमाचा मुख्य उद्देश आहे,”
— तुकाराम मुंढे, सचिव, दिव्यांग कल्याण विभाग