सुरत (प्रतिनिधी) : गुजरातमधील सुरत येथील इंडोर स्टेडियममध्ये नुकतीच “१६ वी भारत सरकार मान्य कुडो नॅशनल स्पर्धा २०२५-२६”, “१६वी कुडो फेडरेशन कप स्पर्धा २०२५-२६” आणि “१७ वी अक्षय कुमार इंटरनॅशनल कुडो स्पर्धा २०२५-२६” मोठ्या उत्साहात पार पडली. २४ ते ३१ ऑक्टोबर दरम्यान झालेल्या या स्पर्धेमध्ये देशभरातून तब्बल ३२ राज्यांतील सुमारे चार हजार स्पर्धकांनी सहभाग घेतला होता. या राष्ट्रीय स्तरावरील स्पर्धेत जम्मू-काश्मीर, आसाम, हिमाचल प्रदेश, हरियाणा, उत्तर प्रदेश, दिल्ली, छत्तीसगड, राजस्थान, गुजरात, महाराष्ट्र, गोवा, कर्नाटक, तमिळनाडू, केरळ तसेच अंदमान-निकोबार बेटांतील खेळाडूंनी सहभाग घेतला.
या भव्य स्पर्धेला सुरतचे पोलीस आयुक्त अनुपमसिंगजी गोलहेत, सुप्रसिद्ध बॉलिवूड अभिनेते अक्षय कुमार, अभिनेत्री डिंपल कपाडिया आणि अभिनेते जॅकी श्रॉफ यांनी उपस्थित राहून खेळाडूंना प्रोत्साहन दिले. कुडो इंडियाचे हेड कोच हांशी मेहुल वोरा आणि रेन्सी व्हीपी खराडी यांनी खेळाडूंना मार्गदर्शन केले.
मुंबई शहर कुडो असोसिएशनचे वरिष्ठ प्रशिक्षक संजय निंगोजी शिंत्रे यांच्या मार्गदर्शनाखाली मुंबईच्या कुडोपटूंनी या स्पर्धेत उत्कृष्ट कामगिरी केली.
त्यामध्ये कु. प्रियांसी संजय शिंत्रे हिने भारत सरकार मान्य १६ वी नॅशनल स्पर्धेत कांस्यपदक मिळवले, तर कु. स्वरा किरण शिरसाट हिने १७ वी अक्षय कुमार इंटरनॅशनल कुडो स्पर्धेत कांस्यपदक पटकावले.
या दोन्ही खेळाडूंच्या यशाबद्दल मुंबई कुडो असोसिएशनतर्फे त्यांचे अभिनंदन करण्यात आले असून, प्रशिक्षक संजय शिंत्रे यांच्या मार्गदर्शनाखाली आणखी कुडोपटू राष्ट्रीय आणि आंतरराष्ट्रीय स्तरावर चमकतील असा विश्वास व्यक्त करण्यात आला.