२० नोव्हेंबरला नवघर तलावात ‘विठू माउली’ंच्या मूर्तीचे लोकार्पण;शहरात उभारला जाणार धर्मवीर संभाजी महाराजांचा भव्य पुतळा!
मिरा-भाईंदर ( प्रमोद देठे) मिरा-भाईंदर शहराच्या विकासाचा आराखडा नव्या जोमानं आकार घेत आहे. शहराच्या सर्वांगीण विकासासाठी उपमुख्यमंत्री एकनाथ शिंदे यांच्या काळात मिळालेल्या १८०० कोटी निधीचा आढावा घेण्यासाठी महाराष्ट्राचे परिवहन व धाराशिव जिल्ह्याचे पालकमंत्री प्रताप सरनाईक यांच्या अध्यक्षतेखाली महत्त्वाची बैठक पार पडली.
या बैठकीत सरनाईक यांनी अधिकाऱ्यांना स्पष्ट शब्दांत निर्देश दिले, “शहराच्या विकासकामांमध्ये वेग, दर्जा आणि पारदर्शकता दिसली पाहिजे. नागरिकांच्या हिताच्या प्रत्येक प्रकल्पाला प्राधान्य द्या.”
पाणीमाफियांवर कडक कारवाईचे आदेश
डाचकुलपाडा परिसरातील ९ बेकायदेशीर बोअरवेल्सवर पाणीमाफियांकडून सुरू असलेल्या धंद्याचा मुद्दा चर्चेत आला.
सरनाईक यांनी “आजच गुन्हे दाखल करा आणि बेकायदेशीर बोअरवेल सील करून गोरगरिबांना त्यांच्या हक्काचं पाणी मिळालंच पाहिजे” असा थेट आदेश पोलीस आणि मनपाला दिला.
त्याचबरोबर या बोअरवेलवर पुढील दोन दिवसांत हँडपंप बसविण्याचे निर्देशही देण्यात आले.
विठू माउलींच्या मूर्तींचे लोकार्पण
ठाण्याच्या उपवन तलावावर उभारलेल्या ५१ फूट विठ्ठलमूर्तीच्या धर्तीवर आता मिरा-भाईंदरमध्ये दोन ठिकाणी विठू माउलींच्या मूर्तींची प्रतिष्ठापना होणार आहे —
२० नोव्हेंबर – नवघर तलाव
१० डिसेंबर – जरीमरी तलाव, काशिमिरा
सरनाईक म्हणाले, “ही मूर्ती भक्ती आणि संस्कृतीचं प्रतीक ठरेल. शहरात अध्यात्माचा आणि अभिमानाचा संगम होणार आहे.”
धर्मवीर संभाजी महाराजांचा भव्य पुतळा
मौजे नवघर, आरक्षण क्र. २९९ येथे धर्मवीर छत्रपती संभाजी महाराजांचा भव्य पुतळा उभारला जाणार असल्याची घोषणा सरनाईक यांनी केली.हा मिरा-भाईंदर महानगरपालिकेच्या हद्दीतील पहिलाच आणि सर्वात मोठा पुतळा असणार आहे.
शहर विकासाचे अनेक प्रकल्प गतीमान
बैठकीत बाळासाहेब ठाकरे कलादालन, शिवसृष्टी-स्कायवॉक प्रकल्प, उत्तन स्मशानभूमी, भाषिक भवनं, प्रमोद महाजन कलादालन, घोडबंदर किल्ला आणि आरटीओ इमारत यांसह अनेक प्रकल्पांचा आढावा घेण्यात आला.
या सर्व कामांना निश्चित मुदतीत पूर्ण करण्याचे आदेश सरनाईक यांनी दिले.
सरनाईक म्हणाले, “मिरा-भाईंदर हे महाराष्ट्राच्या शहरी विकासाचं आदर्श मॉडेल ठरलं पाहिजे.
लोकांच्या समाधानातूनच विकासाचं खऱ्या अर्थानं यश मोजलं जातं.
निधी, प्रशासन किंवा वेळ — कोणत्याही अडचणींना आम्ही विकासात आड येऊ देणार नाही.”