मुंबई: शहरातील पाणी समस्या, भविष्यातील गरजा आणि तंत्रज्ञानाधारित उपाय यावर सखोल विचार आवश्यक असल्याचे मत मिरा भाईंदर महापालिका आयुक्त तथा प्रशासक राधाबिनोद शर्मा (भा.प्र.से.) यांनी व्यक्त केले. ते राष्ट्रीय स्तरावरील ‘Sustainable Water Management Conclave (Maharashtra Edition)’ या कार्यशाळेत मुख्य वक्ते म्हणून बोलत होते.
या प्रसंगी त्यांनी शहरातील पाणी व्यवस्थापनातील सध्याच्या आव्हानांचा आढावा घेतला. जलस्रोतांचे सुयोग्य नियोजन, पाण्याचा अपव्यय रोखण्यासाठी नव्या तंत्रज्ञानाचा वापर तसेच वाढत्या लोकसंख्येनुसार भविष्यातील गरजा पूर्ण करण्यासाठी शाश्वत योजना राबविण्याची गरज त्यांनी अधोरेखित केली.
श्री. शर्मा यांनी सांगितले की, “पाणी हे फक्त संसाधन नाही, तर नागरिकांच्या जीवनमानाशी निगडित मूलभूत घटक आहे. त्यामुळे प्रत्येक शहराने आपली जलधोरणे शास्त्रशुद्ध नियोजन आणि आधुनिक तंत्रज्ञान यांच्या संयोगातून तयार करणे आवश्यक आहे.”
या परिषदेत विविध तज्ञ, नगरविकास अधिकारी आणि जलसंपदा क्षेत्रातील तज्ज्ञांनी सहभाग घेतला. शाश्वत विकासासाठी जलव्यवस्थापनाचे महत्त्व अधोरेखित करत, भविष्यातील पाणी संकटावर उपाययोजना करण्यासाठी ही कार्यशाळा महत्त्वपूर्ण ठरली.