मुंबई – एखादी संस्थाच जर प्रगती करत नसेल तर माझा स्वभाव आहे मी ज्या ज्या संस्थांत गेलो त्या संस्थांना उर्जितावस्था आणली. प्रगतीच्या दृष्टीने अमूलाग्र असे बदल केले. महाराष्ट्राच्या बॉक्सिंगलाही पुन्हा चांगले वैभवाचे दिवस आणू. महायुती सरकार आणि मी तुम्हाला संपूर्ण ताकद देऊ, असे आश्वासन भाजपा गटनेते व महाराष्ट्र गृहनिर्माण स्वयं/समूह पुनर्विकास प्राधिकरणाचे अध्यक्ष (कॅबिनेट मंत्री दर्जा) आमदार प्रविण दरेकर यांनी बॉक्सिंग फेडरेशनच्या पदाधिकाऱ्यांना दिले.
मुंबई जिल्हा बँकेत महाराष्ट्र बॉक्सिंग फेडरेशनच्या पदाधिकाऱ्यांनी आमदार प्रविण दरेकर व आमदार प्रसाद लाड यांची भेट घेतली. या भेटीत बॉक्सिंग फेडरेशनच्या पदाधिकाऱ्यांनी आपली गाऱ्हाणी दरेकर यांच्याजवळ मांडली. याप्रसंगी महाराष्ट्र बॉक्सिंग संघटनेचे माजी अध्यक्ष जय कवळी, माजी उपाध्यक्ष विठ्ठलराव लोखांडकार, भारतीय बॉक्सिंग संघटनेचे सहसचिव राजेश देसाई, मुंबई उपनगर बॉक्सिंग संघटनेचे अध्यक्ष जितेंद्र तावडे, पुणे जिल्हा बॉक्सिंग संघटनेचे भरतकुमार व्हावळ, अभिमन्यु सूर्यवंशी, रत्नागिरी जिल्हा बॉक्सिंग संघटनेचे महेश सकपाळ, वैभव वणकर, नंदुरबारचे मयूर ठाकरे, मयूर बोरसे, चेतन शेवाळे, शैलेश ठाकूर, डॉ. संपत साळुंखे, विजय गुजर, सौ. सविता बावनथळे, अरुण भोसले, असीम गफ्फार शेख, प्रथमेश पाचोडे, विक्रांत खेडकर, संकेत धामंदे, शेख गफ्फार अकबर, राजू महाले, अभय राणे, रिद्विक परब, राजीर खान, विजय गोटे यांसह आदी मान्यवर उपस्थित होते.
यावेळी फेडरेशनच्या पदाधिकाऱ्यांशी संवाद साधताना आ. दरेकर म्हणाले कि, ग्रामीण भागातील मुलांना बॉक्सिंग क्षेत्रात येण्यासाठी प्रोत्साहित करू. ग्रामीण भागातील मुलांमध्ये जी रग असते ती शहरातील मुलांत नसते. ग्रामीण भागातील मुलांना बॉक्सिंगमध्ये प्रशिक्षण दिले तर ते नावलौकिक मिळवतील व महाराष्ट्राचेही नाव मोठे करतील. त्या दृष्टीने पुढील आखणी करू. मी मुंबई बँकेत आलो त्यावेळी बाराशे कोटींची बँक होती, आज पंधरा हजार कोटींवर गेली आहे. गृहनिर्माण क्षेत्रात स्वयं पुनर्विकास योजना आणली. त्याचे प्राधिकरणही स्थापन झालेय. कल्पकतेने गोष्टी केल्या तर त्या साध्य होतात. तशा काही नावीन्यपूर्ण गोष्टी बॉक्सिंगमध्ये आणता येतील का यासाठी प्रयत्न करू, तसेच क्रीडा क्षेत्रात इतर राज्यांच्या तुलनेत आपल्याकडे कमतरता आहे. इतर राज्यांत मोठमोठ्या स्पर्धा होतात. महाराष्ट्रात क्षमता असूनही ती विकसित केली जात नाही. आपली मुलं, मुली क्षमतावान असतानाही मागे राहतात. ती पोकळी भरून काढू, असा विश्वासही दरेकरांनी बॉक्सिंग फेडरेशनला दिला.