मुंबई – आता निवडणुका आल्या आहेत. पाऊस पडला कि बेडकं कशी बाहेर येतात तसे विरोधक आलेत. शरद पवार, उद्धव ठाकरे, राज ठाकरे, बाळासाहेब थोरात, जयंत पाटील यांसारखे मोठे नेते निवडणूक आयोगाला भेटायला गेले. तुम्ही आयोगाला भेटायला गेलात परंतु उध्वस्त झालेल्या शेतकऱ्याच्या बांधावर जायला वेळ नाही. सरकारला शिव्या घालायला वेळ आहे. शेताच्या बांधावर जाऊन शेतकऱ्याला मदत, त्याचे अश्रू पुसण्याचे काम करू शकला नाहीत. आमचे उपमुख्यमंत्री एकनाथ शिंदे यांनी ट्रकच्या ट्रक पाठवले. मुख्यमंत्र्यांनी ३१,६२८ कोटींचे पॅकेज जाहीर केले. तुम्ही काय दिले. तुम्ही नौटंकी करताय, अशा शब्दांत भाजपा गटनेते आमदार प्रविण दरेकर यांनी विरोधकांवर जोरदार प्रहार केला.
आ. प्रविण दरेकर यांच्या वाढदिवसाचे औचित्य दहिसर वैशाली नगर येथील संजीवनी हायस्कुल येथे ज्येष्ठ नागरिकांना ब्लॅंकेट, सुगंधी उटणे आणि पदाधिकाऱ्यांना भेट वस्तूंच्या वाटपाचा कार्यक्रम आयोजित करण्यात आला होता. या प्रसंगी भाजपा मुंबई उपाध्यक्ष प्रकाश दरेकर, माजी जिल्हाध्यक्ष गणेश खणकर, मोतीभाई देसाई, ऍड.शिवाजी चोगले, मागाठाणे विधानसभा संयोजक कृष्णकांत दरेकर, मंडल अध्यक्ष अमित उतेकर, लक्ष्मण कदम, वॉर्ड अध्यक्ष निकेश तळेकर, सुवर्णा सकपाळ, कार्यक्रमाचे आयोजक व महामंत्री सागर पवार, राहुल पवार, नामदेव सूर्यवंशी, गौतम कदम, सचिन म्हात्रे यांसह मोठ्या संख्येने पदाधिकारी, कार्यकर्ते आणि नागरिक उपस्थित होते.
यावेळी बोलताना दरेकर म्हणाले कि, नेहमी अशोक वन येथे वाढदिवस साजरा केला जातो. कार्यक्रम ठेवतो, हारतुरे स्वीकारतो,आनंदाच्या वातावरणात उत्सवाच्या स्वरूपात साजरा करतो. यावेळी राज्यात शेतकऱ्याची भीषण अवस्था आहे. मराठवाडा, धाराशिव, बीड, सोलापूर येथे शेतीच्या शेती उध्वस्त झालीय. महाराष्ट्रात शेतकरी अडचणीत असताना आपण मुंबईत हारतुरे स्वीकारणे हे माझ्यासारख्या सामान्य कार्यकर्त्यांच्या मनाला पटणारे नव्हते. त्यामुळे धाराशिव जिल्ह्यातील परांडा तालुक्यातील वागेगव्हाण गावाला भेट दिली. तेथील ग्रामस्थांना दिवाळी निमित्त फराळ, पणत्या, चादरी यांसह माझ्या खात्यातून दोन-दोन हजार पाठवले. तसेच माझ्या आमदार निधीतून २५ लाख रुपये गावाच्या विकासासाठी देणार आहे. सत्कार तर नेहमीच होत असतात. आपण काय दिले यापेक्षा माणुसकी जपली हे महत्वाचे असल्याचे दरेकर म्हणाले.
दरेकर पुढे म्हणाले कि, जेव्हा आपण अंतःकरणापासून, निःस्वार्थी भावनेने काम करतो तेव्हा कुणाला सांगायची गरज लागत नाही. आपल्या नशिबात जे असते ते मिळत असते. पण प्रामाणिक काम केले तर तुम्हाला यशच मिळेल याचे मूर्तिमंत उदाहरण मी आहे. दोन दिवसांपूर्वी लाडक्या बहिणींसाठी बिनव्याजी कर्ज देण्याचा कार्यक्रम मुंबई बँकेच्या दादर येथील शाखेत पार पडला. जसे शेताच्या बांधावर शेतकऱ्यांसाठी केले तसे मुंबईतील महिलांसाठी रोजगार उपलब्ध करण्यासाठी अभियान सुरु केले आहे. आगामी काळात मुंबई बँकेच्या माध्यमातून महिलांना उद्योग व्यवसायात सक्षम करायचे काम करणार आहोत. काम हिच माझी प्रेरणा असल्याचा उच्चार दरेकरांनी केला.
*मराठी माणसाच्या नावे राजकारण करण्याचे दिवस संपले*
दरेकर म्हणाले कि, आपण स्वयं पुनर्विकास विषय आणला तेव्हा प्राधिकरण व मी अध्यक्ष होईन याची कल्पनाही नव्हती. स्वयं पुनर्विकासात विकासकाशिवाय आपण इमारतीचा विकास करतो. त्याकरिताच हे प्राधिकरण निर्माण केलेय. मराठी माणसासाठी स्व. बाळासाहेब ठाकरे यांच्यानंतर काम झालेच नाही. बीडीडी चाळीचा विकास मुख्यमंत्री देवेंद्र फडणवीस यांच्यामुळे झाला. अभ्यूदय नगर येथे उबाठा गटाचे आमदार आहेत. उद्धव ठाकरे मुख्यमंत्री असताना फाईलवर सहीही केली नाही. ७०-८० वर्षांपासून तेथील मराठी माणूस विकासाच्या प्रतीक्षेत होता. मुख्यमंत्री फडणवीसांनी मराठी माणसाला घर देण्याचे काम केले. दोनशे स्क्वे. फुटातील माणूस आता ६४१ स्क्वे. फुटाच्या घरात राहायला जाणार आहे. मराठी माणसाच्या नावावर राजकारण करायचे दिवस आता संपलेत. विधानसभा निवडणुकीत जनतेने दाखवून दिले. सर्वाधिक मतदान महायुतीला झाले. मुंबईकर बघतोय मुंबई बदलतेय. मुंबईचा चेहरा महायुतीच बदललेल.मुख्यमंत्री देवाभाऊ आणि महायुतीच्या मागे आशीर्वाद उभे करा, असे आवाहनही दरेकरांनी उपस्थितांना केले.