भाईंदर – युनेस्कोने नुकतेच छत्रपती शिवाजी महाराजांच्या बारा दुर्गांना जागतिक वारसा स्थळांचा दर्जा दिल्याचा अभिमानास्पद क्षण साजरा करण्यासाठी महाराष्ट्र राज्य परिवहन मंत्री तथा धाराशिव जिल्ह्याचे पालकमंत्री प्रताप इंदिराबाई बाबुराव सरनाईक आणि युवसेना कार्याध्यक्ष पूर्वेश परिषा प्रताप सरनाईक यांच्या मार्गदर्शनाखाली मीरा-भाईंदर शिवसेनेमार्फत शहरात “किल्ले बनविणे स्पर्धेचे” आयोजन करण्यात आले आहे.
या उपक्रमातून दिवाळी सण, संस्कृती आणि इतिहासाचा सुंदर संगम साधण्याचा प्रयत्न करण्यात आला आहे.
इच्छुक स्पर्धकांना आपला सहभाग २४ ऑक्टोबर २०२५ पर्यंत नोंदविता येईल.
स्पर्धेचे परीक्षण इतिहासतज्ज्ञांकडून २४ ते ३० ऑक्टोबर २०२५ दरम्यान केले जाणार आहे.
दिवाळी, फराळ आणि रांगोळीप्रमाणेच आपल्या सांस्कृतिक वारशाचा भाग म्हणून नागरिकांनी घरासमोर, सोसायटीत, बागेत किंवा बाल्कनीत किल्ल्यांच्या प्रतिकृती तयार करण्याचे आवाहन आयोजकांनी केले आहे.
या उपक्रमाचा उद्देश पुढील पिढ्यांमध्ये शिवछत्रपतींच्या वारशाचा अभिमान जागवणे हा आहे.
आकर्षक बक्षिसे:
प्रथम पारितोषिक: रु.१५०००
द्वितीय पारितोषिक: रु.१००००
तृतीय पारितोषिक: रु.५०००
तसेच प्रत्येक सहभागीला रु.१००० रोख रक्कम व प्रमाणपत्र दिले जाईल.
या उपक्रमाबाबत बोलताना मंत्री प्रताप सरनाईक म्हणाले, “छत्रपती शिवाजी महाराजांनी उभारलेले दुर्ग हे केवळ दगडी बांधकाम नसून आपल्या स्वाभिमानाचे प्रतीक आहेत. युनेस्कोने दिलेली मान्यता ही महाराष्ट्रासाठी अभिमानाची बाब आहे. ‘किल्ले बनविणे स्पर्धा’ हा उपक्रम दीपावलीच्या आनंदात नवा उत्साह आणेल आणि नागरिकांना आपल्या परंपरेशी अधिक जोडेल.”
हा उपक्रम मीरा-भाईंदरकरांसाठी दीपावलीच्या सणात इतिहासाचा गौरव पुन्हा उजळवणारा ठरणार आहे.