मीरा-भाईंदर – दिवाळीच्या शुभमुहूर्तावर मीरा-भाईंदर शहरासाठी महाराष्ट्र राज्याचे परिवहन मंत्री व धाराशिव जिल्ह्याचे पालकमंत्री प्रताप इंदिराबाई बाबूराव सरनाईक यांच्या पुढाकाराने आणि उपमुख्यमंत्री एकनाथजी शिंदे यांच्या नेतृत्वाखाली १८० कोटी रुपयांच्या निधीतून उभारलेले “हिंदुहृदयसम्राट बाळासाहेब ठाकरे कलादालन” येत्या १७ नोव्हेंबर रोजी नागरिकांसाठी खुले होणार आहे. हा दिवस शिवसेनाप्रमुख स्व. बाळासाहेब ठाकरे यांच्या पुण्यतिथीचा असून, त्यांच्या स्मृतींना वाहिलेली ही एक भव्य सांस्कृतिक भेट ठरणार आहे.
दिवाळी सुट्ट्यांमध्ये १८ ते २५ ऑक्टोबर या कालावधीत मिरा-भाईंदरमधील शालेय विद्यार्थ्यांना अत्याधुनिक एआय (AI) तंत्रज्ञानावर आधारित ‘किड्स झोन’ मध्ये मोफत प्रवेश दिला जाणार आहे.
मंत्री सरनाईक म्हणाले, “या उपक्रमाचा उद्देश मुलांना विज्ञान, तंत्रज्ञान आणि नवनवीन शोधांविषयी आकर्षण निर्माण करणे हा आहे.” मात्र, प्रवेशासाठी पूर्वनोंदणी आवश्यक असेल.
कलादालनातील प्रमुख आकर्षणे
स्व. बाळासाहेब ठाकरे यांचा होलोग्राम प्रदर्शन
त्यांच्या जीवनप्रवासावर आणि शिवसेनेच्या स्थापनेवर आधारित डिजिटल प्रदर्शन
विद्यार्थ्यांसाठी ‘स्टडी झोन’ — स्पर्धा परीक्षेच्या तयारीसाठी शांत अभ्यासकेंद्र
ज्येष्ठ नागरिकांसाठी ‘म्युझिक कॉर्नर’ — जुन्या गाण्यांचा खास संग्रह
अ‍ॅम्फीथिएटर, संग्रहालय, ई-लायब्ररी, संगीत केंद्र, बहुउद्देशीय हॉल, कॉन्फरन्स रूम, कॅफेटेरिया, आणि लँडस्केप गार्डन
पर्यावरणपूरक सुविधा — सौरऊर्जा, रेनवॉटर हार्वेस्टिंग, मिनी गार्बेज रीसायकलिंग सिस्टम
मंत्री प्रताप सरनाईक म्हणाले, “स्व. बाळासाहेब ठाकरे यांच्या नावाने उभारलेले हे महाराष्ट्रातील पहिले कलादालन आहे आणि ते मीरा-भाईंदरमध्ये सुरू होत असल्याचा मला प्रचंड अभिमान आहे. कला, संस्कृती आणि नव्या पिढीच्या सर्जनशीलतेला प्रोत्साहन देणारे हे केंद्र शहराच्या प्रगतीचा नवा अध्याय ठरेल.
मीरा-भाईंदरकरांना आता मुंबईत ‘काळा घोडा फेस्टिव्हल’ला जाण्याची गरज नाही — त्या सर्व कलांचा अनुभव आता आपल्या शहरातच घेता येईल. हे कलादालन म्हणजे माझ्याकडून मीरा-भाईंदरकरांना दिवाळीची खास भेट आहे.”