मुंबई – मुंबईतील बॉम्बे एक्झिबिशन सेंटर, गोरेगाव येथे आयोजित IFAT इंडिया प्रदर्शनात मिरा-भाईंदर महानगरपालिकेने पर्यावरणपूरक उपक्रमांची झलक सादर करत सर्वांचे लक्ष वेधून घेतले. या प्रदर्शनात महानगरपालिकेला “माझी वसुंधरा अभियान (MVA)” अंतर्गत “हरित यशोगाथा सन्मान–२०२५” या राज्यस्तरीय प्रतिष्ठित पुरस्काराने गौरविण्यात आले.
या प्रदर्शनात महानगरपालिकेच्या वतीने घनकचरा व्यवस्थापन, सांडपाणी प्रक्रिया आणि पर्यावरण संवर्धन या विषयांवर आधारित माहितीपूर्ण आणि आकर्षक स्टॉल उभारण्यात आला होता.
शहरात राबविण्यात येणाऱ्या विविध शाश्वत प्रकल्पांची माहिती, तांत्रिक सादरीकरणे आणि प्रगतीचे दस्तावेज नागरिकांसमोर मांडण्यात आले.
महानगरपालिका आयुक्त तथा प्रशासक मा. राधाबिनोद अ. शर्मा (भा.प्र.से.) यांनी प्रदर्शनातील विविध स्टॉलना भेट देऊन नव्या तंत्रज्ञानाची माहिती घेतली आणि महानगरपालिकेच्या स्टॉलचे विशेष कौतुक केले.
“भूमी” या विषयाखाली मिरा-भाईंदर महानगरपालिकेला पर्यावरण संवर्धन, शाश्वत शहरी विकास आणि हवामान बदल नियंत्रणातील प्रभावी उपक्रमांसाठी सन्मानित करण्यात आले.
“Celebrating Maharashtra’s Climate Leadership at the Local Level” या विशेष कार्यक्रमात हा पुरस्कार प्रदान करण्यात आला.
महानगरपालिकेच्या वतीने आयुक्त तथा प्रशासक राधाबिनोद अ. शर्मा (भा.प्र.से.),उपायुक्त (मुख्यालय) कल्पिता पिंपळे, आणि कार्यकारी अभियंता शरद नानेगावकर यांनी हा पुरस्कार स्वीकारला.
या कार्यक्रमात महिला बचत गटांच्या माध्यमातून राबविण्यात येणाऱ्या “फराळ सखी” उपक्रमाची माहितीही उपस्थित मान्यवरांना देण्यात आली.
महिलांच्या आत्मनिर्भरतेस प्रोत्साहन देणाऱ्या या उपक्रमांतर्गत स्थानिक बचत गटांकडून तयार करण्यात आलेल्या दिवाळी फराळ वस्तूंचे आकर्षक हॅम्पर्स तयार करण्यात आले आहेत.
आयुक्तांच्या हस्ते खासदार श्रीकांत शिंदे आणि प्रसिद्ध सिनेअभिनेत्री तसेच संयुक्त राष्ट्र संघ पर्यावरण सदिच्छा दूत दिया मिर्झा यांना हे हॅम्पर्स भेट देण्यात आले.
दिया मिर्झा यांनी “फराळ सखी” उपक्रमाचे आणि महापालिकेच्या प्रयत्नांचे विशेष कौतुक केले.
आयुक्त राधाबिनोद शर्मा यांनी सांगितले की, “मिरा-भाईंदर महानगरपालिका हरित, स्वच्छ आणि हवामान-संवेदनशील शहर घडविण्याच्या दिशेने सातत्याने प्रयत्नशील आहे.
पर्यावरणपूरक उपक्रमांद्वारे नागरिकांचा सहभाग वाढवून शाश्वत विकास साध्य करणे हेच आमचे उद्दिष्ट आहे.
हा सन्मान मिरा-भाईंदरच्या प्रत्येक नागरिकाचा अभिमान आहे.”