प्रमोद देठे – आरटीआय कार्यकर्ते अनिल गलगली यांनी महाराष्ट्राचे उपमुख्यमंत्री व गृहमंत्री मा. देवेंद्र फडणवीस यांना पत्र लिहून बृहन्मुंबई महानगरपालिकेत (BMC) मोठ्या प्रमाणावर सुरू असलेल्या अधिकाऱ्यांच्या बदल्यांविषयी गंभीर लक्ष वेधले आहे.
गलगली यांनी त्यांच्या पत्रात म्हटले आहे की, अतिरिक्त आयुक्त डॉ. अमित सैनी यांच्या अखत्यारीत आतापर्यंत १२२ अधिकाऱ्यांच्या बदल्या करण्यात आल्या असून, आणखी १०० बदल्या प्रक्रियेत आहेत. या सततच्या बदल्यांमुळे विभागांमध्ये गोंधळ, अस्थिरता आणि प्रशासकीय कामकाजात अडथळे निर्माण होत असल्याचा त्यांनी आरोप केला आहे.
आरटीआय कार्यकर्ते अनिल गलगली यांनी मुख्यमंत्री फडणवीस यांच्याकडे पुढील तीन प्रमुख मागण्या केल्या आहेत-
१) बृहन्मुंबई महानगरपालिका अंतर्गत सुरू असलेला बदल्यांचा बाजार तात्काळ थांबवावा.
२) मागील ६ महिन्यांतील सर्व बदल्यांना स्थगिती द्यावी.
३) भविष्यात बदल्या करण्यासाठी स्वतंत्र, पारदर्शक आणि निष्पक्ष समिती स्थापन करावी.
गलगली यांनी स्पष्ट केले की, सततच्या बदल्यांमुळे मनुष्यबळाचा योग्य उपयोग होत नाही, तसेच काही ठिकाणी भ्रष्टाचार आणि राजकीय हस्तक्षेपाला प्रोत्साहन मिळत असल्याचीही नागरिकांमध्ये भावना आहे. त्यामुळे शासनाने या प्रकरणाची चौकशी करून पारदर्शक प्रणाली लागू करावी, अशी त्यांनी मागणी केली आहे.