अतिवृष्टीने नुकसान झालेल्या वागेगव्हाण गावची भाजपा गटनेते प्रविण दरेकर यांच्याकडून पाहणी
गावातील मूलभूत सुविधांसाठी २५ लाखांचा निधी देणार; वाढदिवस शेतकऱ्याच्या बांधावर सेवाभावी वृत्तीने साजरा
धाराशिव- अतिवृष्टीने नुकसान झालेल्या धाराशिव जिल्ह्यातील परांडा तालुक्यातील वागेगव्हाण गावातील ग्रामस्थांना भाजपा विधानपरिषद गटनेते व महाराष्ट्र गृहनिर्माण स्वयं/समूह पुनर्विकास प्राधिकरणाचे अध्यक्ष आमदार प्रविण दरेकर यांनी मदतीचा हात दिला आहे. दरेकर यांनी आज त्यांच्या वाढदिवसानिमित्त हारतुरे यांचा सन्मान न स्वीकारता वागेगव्हाण गावातील ग्रामस्थांची भेट घेतली आणि २५ लाख रुपयांचा निधी माझ्या आमदार निधीतून वागेगव्हाण गावाला देणार असल्याचे जाहीर केले.
धाराशिव जिल्ह्यात झालेल्या अतिवृष्टीने परांडा तालुक्यातील अनेक गावे बाधित झाली होती. या गावातील ग्रामस्थांना दिलासा द्यावा या भावनेतून भाजपा गटनेते आ. प्रविण दरेकर यांनी त्यांच्या वाढदिवसानिमित्त सहकुटुंब वागेगव्हाण गावाला भेट दिली. यावेळी दरेकर यांनी स्वतःच्या बँक खात्यातून वागेगव्हाण गावातील २५४ ग्रामस्थांच्या खात्यात दोन-दोन हजार रुपयांच्या आर्थिक मदतीसह दिवाळीनिमित्त फराळ, दिवे, ब्लॅंकेट, महिलांना साडी आणि शाळेतील विद्यार्थ्यांना शालेय वस्तूंचे वाटप केले. तसेच दरेकर यांनी अतिवृष्टीने बाधित झालेल्या भागाची पाहणी करत ग्रामस्थांशी संवादही साधला. याप्रसंगी तुळजापूर विधानसभेचे आमदार राणाजगजितसिंह पाटील, माजी आमदार सुरजीत सिंह ठाकूर, जिल्हाध्यक्ष दत्ताभाऊ कुलकर्णी, नितीन काळे, सुखदेव तोंडपे, सौ. सायली प्रविण दरेकर, डॉ. यश प्रविण दरेकर तसेच कृषी, महसूल आणि पंचायत समितीचे अधिकारी यांसह मोठ्या संख्येने ग्रामस्थ उपस्थित होते.
यावेळी ग्रामस्थांशी संवाद साधताना आ. दरेकर म्हणाले कि, महाराष्ट्रात कधी नव्हे एवढं संकट बळीराजावर कोसळले. माझ्या वाढदिवशी हार-तुरे घेण्यापेक्षा जे पूरग्रस्त आहेत त्यांना भेटून त्यांची सुख-दुःखे समजून घ्यावीत, त्यांना भेटवस्तू द्याव्यात, दिवाळीच्या पार्श्वभूमीवर भाजपा व सरकार आपल्या पाठीशी आहे हे सांगण्यासाठी व तुम्हाला पुन्हा नव्या उमेदीने वाटचाल करायची आहे, या भावनेतून मी वागेगव्हाण गावी उपस्थित राहिलो.
दरेकर पुढे म्हणाले कि, अतिवृष्टीने काही घरे पाण्याखाली गेली आहेत. पहिला सुका दुष्काळ येथे असायचा परंतु आज ओल्या दुष्काळाला सामोरे जावे लागलेय. सरकारने तुमचे गाव दत्तक घ्यावे हि तुमची अपेक्षा आहे. काळजी करू नका तुमच्या गावासाठी जे जे लागेल त्यासाठी तुमचा सेवक म्हणून सरकार दरबाराहून मदत घेऊ. महाराष्ट्रातील शेतकरी अनेक संकटे झेलतो, संकटाला घाबरत नाही. २५ लाख रुपयांचा निधी माझ्या आमदार निधीतून वागेगव्हाण गावाला देणार असून माझ्या खात्यातून गावातील २५४ ग्रामस्थांना दिवाळीनिमित्त दोन-दोन हजार रुपयांची आर्थिक मदत दिली असल्याचेही दरेकरांनी सांगितले.
देवेंद्र फडणवीस संवेदनशील मुख्यमंत्री
दरेकर म्हणाले कि, सातारा, सांगली आणि कोल्हापूर येथे ज्यावेळी पूर आला होता त्यावेळी सरकारने चांगले पॅकेज जाहीर केले होते. आताही जे संकट आलेय त्याला सरकारने ३१,६२८ कोटींचे पॅकेज दिले आहे. सरकार मुख्यमंत्री देवेंद्र फडणवीस यांच्या नेतृत्वाखाली तुमच्या छोट्या छोट्या गोष्टींचा विचार करतेय. शेतकऱ्यांप्रती संवेदना असणारा मुख्यमंत्री देवेंद्र फडणवीस यांच्यासारखा राजकीय नेता माझ्या आयुष्यात पाहिला नसल्याचेही दरेकर यांनी यावेळी म्हटले.