( प्रमोद देठे ): मिराभाईंदर रोड येथील गोल्डन नेस्ट परिसरात रस्ता सौंदर्यीकरणासाठी ६ महिन्यांपूर्वी लाखो रुपये खर्चून बसविलेल्या लोखंडी रेलिंग्ज नुकत्याच रस्ता रुंदीकरणाच्या नावाखाली कापून टाकण्यात आल्या आहेत. विशेष म्हणजे या रेलिंगवर आमदार प्रताप सरनाईक यांचे नाव लिहिलेले होते.
स्थानिक नागरिकांच्या म्हणण्यानुसार, रस्ता रुंदीकरणाच्या कामासाठी कोणतेही अधिकृत कार्यादेश (वर्क ऑर्डर) नसताना ठेकेदाराची माणसे अचानक रेलिंग तोडत असल्याचे दिसून आले. त्याचे फोटो आणि व्हिडिओ सोशल मीडियावर व्हायरल झाल्यानंतर मनसे पक्षाने तत्काळ दखल घेतली.
मिरा-भाईंदर मनसे शहराध्यक्ष संदीप राणे आणि त्यांच्या सहकाऱ्यांनी घटनास्थळी जाऊन ठेकेदारांच्या कर्मचाऱ्यांना रेलिंग कापण्याचे काम थांबविण्याचे सांगितले आणि वर्क ऑर्डर दाखविण्याची मागणी केली. मात्र, संबंधित कर्मचाऱ्यांकडे कोणतेही लेखी आदेश नसल्याचे समोर आले.
या घटनेनंतर मनसे शहर अध्यक्ष संदिप राणे यांनी प्रश्न उपस्थित केला आहे की , “ लाखो रुपये खर्चून रेलिंग बसविल्यानंतर काही महिन्यांतच त्याच रेलिंग्ज तोडण्याची वेळ का आली? विकासाच्या नावाखाली जनतेचा पैसा वाया घालविण्याची जबाबदारी कोणाची?”
स्थानिक नागरिकांनीही या कामावर नाराजी व्यक्त केली आहे. त्यांच्या म्हणण्यानुसार, महापालिका सार्वजनिक बांधकाम विभाग आणि एमएमआरडीए यांच्यातील समन्वय आणि नियोजनाचा अभाव स्पष्टपणे दिसत आहे.
मनसेच्या आक्रमक भूमिकेमुळे आता या प्रकरणात मिरा-भाईंदर महापालिका व एमएमआरडीए अधिकाऱ्यांची भूमिका काय राहते, याकडे सर्वांचे लक्ष लागले आहे.