मुंबई : राज्याचे उपमुख्यमंत्री एकनाथ शिंदे यांच्याविरोधात फेसबुकवर आक्षेपार्ह व बदनामीकारक पोस्ट करण्यात आल्याचा गंभीर प्रकार उघडकीस आला आहे. गणेश शिंदे (रा. स्वराज बिल्डिंग, एम. पी. मिल्स कंपाउंड) या व्यक्तीने आपल्या फेसबुक अकाऊंटवरुन उपमुख्यमंत्री यांच्याविरोधात खालच्या पातळीचे, अश्लील व अपमानकारक शब्द वापरत एक पोस्ट प्रसारित केली आहे, अशी माहिती शिवसेना मालबार हिल विधानसभा विभागप्रमुख प्रविण कोकरे यांनी दिली. या प्रकारामुळे समाजात तणाव निर्माण होण्याची शक्यता असून, कायदा-सुव्यवस्थेला धोका निर्माण होऊ शकतो. त्यामुळे ताडदेव पोलीस ठाण्याचे वरिष्ठ पोलीस निरीक्षक यांच्याकडे लेखी तक्रार देऊन संबंधित पोस्ट तातडीने हटवण्याची मागणी करण्यात आली आहे.
प्रविण कोकाटे यांनी आपल्या तक्रारीत म्हटलं आहे की, “उपमुख्यमंत्री यांच्याविरोधात केलेली ही पोस्ट केवळ राजकीय द्वेषातून प्रेरित असून, त्याचा उद्देश समाजात चुकीचा संदेश देणे हा आहे. त्यामुळे संबंधित व्यक्तीवर भारतीय दंड संहितेच्या 153A, 500, 504, 505 तसेच माहिती तंत्रज्ञान अधिनियम (IT Act) अंतर्गत गुन्हा नोंदवावा.”
या प्रकरणाची पोलीस यंत्रणा गंभीर दखल घेईल आणि दोषींवर कठोर कारवाई होईल, अशी अपेक्षा व्यक्त करण्यात येत आहे.
ह्या प्रसंगी शिवसेना मालबरहिल विधानसभा विभागप्रमुख प्रवीण कोकाटे यांच्यासह विधानसभा संघटक उमेश वळसे, महिला विधानसभा संघटक संध्या डुंबरे, शाखाप्रमुख संतोष घुगे, शाखाप्रमुख शिवा सावंत , शाखाप्रमुख ललित माधव, शाखाप्रमुख आकाश चाबुकस्वार,शाखाप्रमुख नितीन गावडे, शाखप्रमुख संतोष सकपाळ उपस्थित होते.