मुंबई: पुनर्विकास प्राधिकरणाचे अध्यक्ष आणि भाजपचे आमदार प्रविण दरेकर यांचा रिपब्लिकन पार्टी ऑफ इंडिया (आठवले गट)च्या वतीने दहिसर (पूर्व) येथे भव्य सत्कार करण्यात आला. या प्रसंगी दरेकर यांनी आपले मनोगत व्यक्त करताना सांगितले की, “मी आंबेडकर विचारांचा पाईक आहे. रिपब्लिकन पक्ष माझा सत्कार करतोय याचा विशेष आनंद आहे. तोही नेता म्हणून नव्हे तर कार्यकर्ता म्हणून, हे विशेष महत्वाचं आहे.”
या कार्यक्रमात उत्तर मुंबईचे माजी खासदार गोपाळ शेट्टी, आरपीआयचे सरचिटणीस गौतम सोनावणे, उत्तर मुंबई निरीक्षक कमलेश यादव, जिल्हाध्यक्ष रमेश गायकवाड, प्रमोद मोरे, भाजपा मुंबई उपाध्यक्ष प्रकाश दरेकर, तसेच अनेक पदाधिकारी आणि नागरिक उपस्थित होते.
दरेकर पुढे म्हणाले, “माझा कुठलाही राजकीय वारसा किंवा आर्थिक बळ नव्हतं. एका खेड्यातून मुंबईत आलो आणि संघर्षातून आज या पदावर आलो आहे. माझ्या आत्मविश्वासाच्या जोरावर मी यश संपादन केलं आहे.”
मुख्यमंत्री देवेंद्र फडणवीस यांच्या सहकार्याने त्यांनी स्वयंपुनर्विकास धोरण पुढे रेटले. त्यांच्या अध्यक्षतेखाली स्थापन झालेल्या दरेकर समितीने केवळ अडीच महिन्यांत आपला अहवाल सादर केला आणि त्याआधारे सरकारने प्राधिकरण स्थापन केलं. आज मुंबईत १६ इमारती उभ्या राहिल्या असून, अनेक नागरिक मोठ्या घरात स्थायिक झाले आहेत, असेही त्यांनी स्पष्ट केले.
त्यांनी सांगितले की, स्वयंपुनर्विकास हे केवळ शहरापुरते मर्यादित न राहता राज्यभर पसरावे, यासाठी विविध शासकीय जमिनीवरील चाळी, पोलीस वसाहती, सफाई कामगार वसाहती, समाजकल्याणच्या जमिनीवरील सोसायट्यांचा समावेश त्यांच्या अहवालात करण्यात आला आहे. मध्यमवर्गीयांसाठी हे प्राधिकरण उपयुक्त ठरेल, असा विश्वास त्यांनी व्यक्त केला.
कार्यकर्त्यांना उद्देशून बोलताना दरेकर म्हणाले, “रिपब्लिकन पक्षाच्या कार्यकर्त्यांनी फक्त सत्कारापुरते न थांबता स्वयंपुनर्विकासाच्या मोहिमेत झोकून द्यावे. महिलांसाठीच्या योजना समजून त्यांचा लाभ द्यावा. तरुणांसाठी रोजगार निर्मितीसाठी रचनात्मक काम करावे. मी तुमच्या पाठीशी कायम उभा आहे.”
कार्यक्रमाच्या शेवटी त्यांनी आयोजक रमेश गायकवाड यांचे आभार मानताना एक ओळीतील कविता सादर केली “प्रविण दरेकर आहे चमकता तारा,
रमेश गायकवाड माझा सच्च्या मित्र प्यारा.”