मुंबई – रस्ता अपघातांप्रमाणेच सायबर फसवणुकीच्या घटनांमध्येही ‘गोल्डन अवर’ महत्त्वाचा ठरतो. फसवणूक लक्षात येताच तातडीने तक्रार केल्यास आर्थिक नुकसान थांबवणे शक्य होते. त्यामुळे अशा घटनांमध्ये 1930 किंवा 1945 या हेल्पलाइन क्रमांकांवर विनाविलंब तक्रार नोंदवावी, असे आवाहन मुख्यमंत्री देवेंद्र फडणवीस यांनी केले.
ते ‘सायबर जनजागृती महा ऑक्टोबर 2025’ कार्यक्रमाच्या उद्घाटनप्रसंगी बोलत होते. हा कार्यक्रम महाराष्ट्र पोलीस मुख्यालयात पार पडला. यावेळी ‘सायबर योद्धा’ या लहान मुलांसाठीच्या कॉमिक बुकलेटचे प्रकाशन करण्यात आले. तसेच सायबर जनजागृतीसाठी काम करणाऱ्या सायबर वॉरियर्सचा सत्कार देखील करण्यात आला.
मुख्यमंत्री फडणवीस म्हणाले की,“राज्यात जागतिक दर्जाची सायबर सिक्युरिटी लॅब, प्रतिसाद केंद्रे आणि नियामक यंत्रणा उभारण्यात आल्या आहेत. ‘डीपफेक’सारख्या नव्या आव्हानांना तोंड देण्यासाठी क्षमतावाढ गरजेची आहे.”
त्यांनी स्पष्ट केले की, “कोणताही डिजिटल गुन्हा त्याचा डिजिटल फिंगरप्रिंट मागे ठेवतो. त्यामुळे फसवणुकीचा वेळीच मागोवा घेऊन कारवाई करणे शक्य होते. या क्षेत्रात तांत्रिक कौशल्यासोबत जनजागृतीही तितकीच महत्त्वाची आहे.”
युवकांपर्यंत सायबर सुरक्षेची माहिती पोहोचवणे आवश्यक असून, त्यात कम्युनिकेटर्सची (संचार माध्यमांची) महत्त्वपूर्ण भूमिका आहे, असेही त्यांनी नमूद केले. या कार्यक्रमाला पोलीस महासंचालक रश्मी शुक्ला, गृह विभागाचे अपर मुख्य सचिव इक्बाल सिंह चहल, अभिनेता अक्षय कुमार, अभिनेत्री राणी मुखर्जी, व्हीजेटीआयचे डॉ. फारूक काझी, ‘आयआयटी मुंबई’चे प्रा. मंजेश हनवाल, तसेच अनेक वरिष्ठ पोलीस अधिकारी उपस्थित होते.