पुणे – सकाळ समूहातर्फे कोथरूड येथे ‘स्वयंपुनर्विकासाचे नवे पर्व’ या विषयावर परिसंवादाचे आयोजन करण्यात आले होते. या परिसंवादाचे उदघाटन प्रमुख पाहुणे व स्वयं/समूह पुनर्विकास प्राधिकरणाचे अध्यक्ष (कॅबिनेट मंत्री दर्जा) आमदार प्रविण दरेकर यांच्या शुभहस्ते पार पडले. यावेळी मुंबईप्रमाणे पुण्यातही आत्मनिर्भर हौसिंग करून दाखवू आणि सर्वसामान्य माणसाला मोठे घर उपलब्ध करून देऊ, असे आवाहन दरेकर यांनी उपस्थितांना केले.
या कार्यक्रमाला महाराष्ट्र सहकारी गृहनिर्माण संस्था फेडरेशनचे अध्यक्ष सुहास पटवर्धन, रांजेकर रिअल्टीचे डायरेक्टर अनिरुद्ध रांजेकर, रविंद्र रांजेकर, सीए महेश भागवत, यांसह मोठ्या संख्येने गृहनिर्माण संस्थांचे प्रतिनिधी उपस्थित होते.
यावेळी उपस्थितांना मार्गदर्शन करताना आ. दरेकर म्हणाले कि, प्रत्येकाचे मोठे घर असावे असे स्वप्न असते. स्वतःच स्वतःची इमारत पुनर्विकसित करून आपले घर व्हावे आणि स्वयंपुनर्विकासाच्या माध्यमातून विकासक देईल त्यापेक्षा मोठे घर मिळेल हाच खरा स्वयंपुनर्विकासाचा गाभा आहे. त्यासाठी ‘सकाळ’ समूहाने पुढाकार घेतलाय. गेल्या १०-१५ वर्षापासून गृहनिर्माण सोसायटीचा पुनर्विकास व्हावा या विषयावर मी काम करतोय. स्वयंपुनर्विकास म्हणजे फार मोठी जादू किंवा टेक्नॉलॉजी नाही. विकासकाशिवाय इमारत उभी करायची. विकासक जो नफा कमावतो तो जागेच्या स्वरूपात आपल्या सभासदांना मिळावा हे स्वयंपुनर्विकासाचे गणित असल्याचे दरेकरांनी म्हटले.
ते पुढे म्हणाले कि, मुंबई बँकेचा अध्यक्ष झाल्यावर या योजनेसाठी जिल्हा बँकेने कर्ज धोरण बनवले. मुख्यमंत्र्यांनी या योजनेला राजाश्रय दिला. गोरेगाव येथे झालेल्या गृहनिर्माण परिषदेत स्वयं पुनर्विकासासाठी १८ मागण्या केल्या. त्यापैकी १६ शासन निर्णय तात्काळ निघाले. आज मुंबई बँकेत १६०० प्रस्ताव स्वयंपुनर्विकासाचे आलेत. त्यापैकी ४६ सोसायट्यांना कर्ज दिले असून १६ इमारती उभ्या राहिल्या आहेत आणि लोकं मोठ्या घरात राहायलाही गेली आहेत. स्वयं पुनर्विकासामुळे मोठी जागा मिळाल्याने मुंबईतील मराठी माणूस मुंबईतच राहणार आहे. तसेच या विषयाला माझ्या अध्यक्षतेखाली समिती नेमल्याने गती मिळाली. आमच्या समितीने महाराष्ट्राचा दौरा करून स्वयं पुनर्विकासात काय अडचणी आहेत, त्या सोडविण्यासाठी काय केले पाहिजे, स्वयंपुनर्विकासासाठी स्वतंत्र प्राधिकरण नेमावे, अशा शिफारशिंचा समावेश केला आणि त्याचा अहवाल तीन महिन्याऐवजी अडीच महिन्यातच सरकारला सादर केला. मुख्यमंत्री देवेंद्र फडणवीस यांनी तो अहवाल जसाच्या तसा स्वीकारून या प्राधिकरणाचा अध्यक्षही मलाच केले. नेतृत्व संवेदनशील असले तर काम कसे करते याचे मूर्तिमंत उदाहरण ‘देवाभाऊ’ असल्याचेही दरेकरांनी स्पष्ट केले.
ते पुढे म्हणाले कि, स्वयं/समूह पुनर्विकास प्राधिकरणाच्या माध्यमातून आणखी निर्णय होणार आहेत. पुणे, पिंपरी-चिंचवडसाठी वेगळे निर्णय घेण्याची गरज आहे का? याचा अंतर्भाव घेऊन सरकार टप्प्याटप्प्याने शासन निर्णय येणाऱ्या काळात करणार आहे. १५-१६ वर्ष मी याच विषयावर काम करत आहे. स्वयंपुनर्विकासासाठी ज्या मागण्या मुख्यमंत्री फडणवीस यांच्याकडे केल्या त्या त्यांनी तात्काळ मागण्या केल्या. जे प्राधिकरण आहे त्यात जसे विषय येतील ते मार्गी लावू. स्वयंपुनर्विकासाबाबत मुंबईला ज्या सवलती लागू आहेत त्या तशाच्या तशा पुण्यालाही लागू कराव्यात यासाठी शासन आदेश करून घेणार आहोत. पुणे जिल्हा बँक भक्कम आहे. तीला आर्थिक अडचण नाही. पुणे जिल्हा बँकेनेही स्वयंपुनर्विकासाबाबत धोरण करावे, कर्ज योजना चालू करावी यासाठी उपमुख्यमंत्री अजीत पवार यांच्याशी चर्चा करू. सुदैवाने या प्राधिकरणाच्या अध्यक्ष पदाची जबाबदारी माझ्याकडे दिलीय. जिथे जिथे मदत, मार्गदर्शन लागेल तिथे पाठीशी राहू. ‘तूच आहेस तुझ्या जीवनाचा शिल्पकार‘ या भूमिकेतून आपली इमारत उभी करूया. मुख्यमंत्रीही स्वयंपुनर्विकासाच्या पाठीशी आहेत. पुण्यातील नागरिकांनीही या मोहिमेत सहभागी व्हावे, असे आवाहनही दरेकर यांनी यावेळी केले.
*सर्वसामान्यांसाठी स्वयंपुनर्विकास म्हणजे आधार*
दरेकर म्हणाले कि, स्वयंपुनर्विकासाचा फायदा म्हणजे विकासकाशिवाय गृहनिर्माण संस्था इमारत उभी करते. विकासकाला गुणवत्तेविषयी देणेघेणे नसते. स्वयंपुनर्विकासात गुणवत्ता राखली जाते आणि स्वाभिमानही जपला जातो. आपण इमारतीला काय काय हवे हे स्वतःचे स्वतःच ठरवत असतो. पंतप्रधान नरेंद्र मोदी यांचा आत्मनिर्भर भारत विषय आहे त्यात आत्मनिर्भर हौसिंगचाही समावेश आहे. स्वयंपुनर्विकासाचे वारे मुंबईत मोठ्या प्रमाणावर वाहत आहेत. जोपर्यंत चंद्र-सूर्य आहेत तोपर्यंत इमारतींचा पुनर्विकास होत राहणार आहे. स्वयंपुनर्विकास हा सर्वसामान्यांना एक आधार निर्माण झाला असल्याचेही दरेकर म्हणाले.