नागपूर जिल्ह्यात ९४१ उमेदवारांना शासकीय नियुक्तीपत्रांचे वितरण

नागपूर जिल्ह्यात ९४१ उमेदवारांना शासकीय नियुक्तीपत्रांचे वितरण

मुख्यमंत्री देवेंद्र फडणवीस व महसूल मंत्री चंद्रशेखर बावनकुळे यांच्या उपस्थितीत राज्यस्तरीय रोजगार मेळाव्याचे आयोजन

नागपूर, दि. ४ ऑक्टोबर –

राज्यातील शासकीय सेवांमध्ये अनुकंपा तत्वावर व सरळ सेवा भरती प्रक्रियेतून निवड झालेल्या उमेदवारांना आज मुख्यमंत्री देवेंद्र फडणवीस यांच्या हस्ते नियुक्तीपत्रे प्रदान करण्यात आली. नागपूर येथील कविवर्य सुरेश भट सभागृहात आयोजित जिल्हास्तरीय कार्यक्रमात एकूण ९४१ उमेदवारांना विविध शासकीय विभागांमध्ये नियुक्तीपत्रे वितरित करण्यात आली.

महसूल मंत्री तथा जिल्ह्याचे पालकमंत्री चंद्रशेखर बावनकुळे यांनी दूरदृश्य प्रणालीद्वारे या कार्यक्रमाला संबोधित केले. त्यांनी नव्याने नियुक्त झालेल्या उमेदवारांना शासनाच्या लोककल्याणकारी सेवा आत्मियतेने आणि प्रामाणिकपणे जनतेपर्यंत पोहोचवण्याचे आवाहन केले.

राज्यभरात एकूण १०,३०९ उमेदवारांना नियुक्तीपत्रे प्रदान करण्यात आली. त्यात नागपूर जिल्ह्यातील भरतीत गट-क (अनुकंपा) १२७, गट-ड (अनुकंपा) १५६, महाराष्ट्र लोकसेवा आयोगामार्फत निवड ३०३, महापालिकेतील सरळ सेवा १५६, व लाड-पागे समिती शिफारशींनुसार १९९ अशा विविध विभागांतील पदांचा समावेश होता.

कार्यक्रमाला खासदार श्यामकुमार बर्वे, आमदार आशिष देशमुख, आमदार प्रवीण दटके, विभागीय आयुक्त विजयलक्ष्मी बिदरी, पोलीस आयुक्त डॉ. रवींद्र कुमार सिंगल, महापालिका आयुक्त डॉ. अभिजित चौधरी, जिल्हाधिकारी डॉ. विपीन इटनकर यांच्यासह अनेक अधिकारी उपस्थित होते.

कार्यक्रमात प्रतीकात्मक स्वरूपात काही निवडक उमेदवारांना नियुक्तीपत्रे प्रदान करण्यात आली. महसूल विभाग, महापालिका, जिल्हा परिषद, सार्वजनिक बांधकाम विभाग, पोलीस विभाग अशा विविध कार्यालयांमध्ये लिपिक, शिपाई, अभियंता, परिचारीका, अंगणवाडी परिवेक्षिका, फायरमॅन आदी पदांवर निवड झालेल्या उमेदवारांचा समावेश होता.

जिल्हाधिकारी डॉ. विपीन इटनकर यांनी कार्यक्रमाचे प्रास्ताविक करत शासनाच्या अनुकंपा धोरणातील सुधारणांबाबत माहिती दिली. विविध शासकीय विभागांकडून लावण्यात आलेल्या माहिती स्टॉल्सवरून उमेदवारांनी नियुक्तीपत्रे प्राप्त केली.

कार्यक्रमाच्या समारोपप्रसंगी अतिरिक्त जिल्हाधिकारी प्रवीण महिरे यांनी उपस्थितांचे आभार मानले