मुंबई – मुंबई विद्यापीठाच्या कालिना येथील न्यू गर्ल्स वसतिगृहाची आमदार प्रवीण दरेकर यांच्या अध्यक्षतेखाली गठित केलेल्या विधीमंडळाच्या समितीने पाहणी केली. वसतिगृहाच्या सोयी-सुविधांबाबत वसतिगृहातील विद्यार्थिनिशी समितीने संवाद साधून त्यांच्या समस्या जाणून घेतल्या आणि समस्या सोडविण्याचे आश्वासनही दिले.
विधिमंडळाच्या सन २०२४ च्या पावसाळी अधिवेशनात आ. मेघना बोर्डीकर व इतर सदस्यांनी मुंबई विद्यापीठाच्या न्यू गर्ल्स वसतिगृहात मूलभूत सोयी सुविधा उपलब्ध करून देण्याबाबत तारांकित प्रश्न उपस्थित केला होता. यावेळी सभागृहात झालेल्या चर्चेच्या वेळी उच्च शिक्षण मंत्र्यांनी आमदारांची समिती गठित करण्याचे आश्वासन दिले होते. त्यानुसार दोन्ही सभागृहाच्या सहा सदस्यांची समिती गठीत करण्यात आली होती. त्यानुसार समितीने वसतिगृहाची पाहणी केली. यावेळी समितीचे सदस्य आ. अनिल परब, आ. निरंजन डावखरे, आ. मनीषा कायंदे यांसह मुंबई विद्यापीठाचे कुलगुरु डॉ. रविंद्र कुलकर्णी उपस्थित होते.
या भेटीत आमदार दरेकर यांच्यासह सर्व सदस्यांनी विद्यापीठाचे कॅन्टींन, किचन, पाण्याची व्यवस्था आणि परिसराची पाहणी केली. वसतिगृहातील मुलींच्या रूम्सवर जाऊन त्यांच्याशी संवाद साधला आणि त्यांच्या सुरक्षिततेची माहिती जाणून घेतली. यावेळी वसतिगृहाच्या परिसरात सीसीटीव्ही लावण्याचे निर्देश दिले. पाण्याच्या समस्येबाबत मुंबई महापालिका आयुक्तांशी बैठक घेऊन प्रश्न मार्गी लावू, असेही दरेकर यांनी आश्वस्त केले.
येत्या दोन दिवसांत मादाम कामा रोड आणि जगन्नाथ शंकरशेठ रोड येथील वसतिगृहांची देखील समिती पाहणी करणार असून त्यानंतर समिती आपला अहवाल विधिमंडळाला येणाऱ्या अधिवेशनात सादर करणार आहे, अशी माहिती दरेकर यांनी दिली