मुंबई, २ ऑक्टोबर — राष्ट्रपिता महात्मा गांधी आणि माजी पंतप्रधान लालबहादूर शास्त्री यांच्याशी संबंधित दुर्मिळ दस्तऐवजांचे प्रदर्शन सर्वसामान्य नागरिकांसाठी खुले करण्यात आले असून “हे ऐतिहासिक दस्तऐवज अधिकाधिक नागरिकांनी पाहावेत,” असे आवाहन सांस्कृतिक कार्य मंत्री ॲड. आशिष शेलार यांनी केले आहे.
सेवा सप्ताहाच्या निमित्ताने महाराष्ट्र शासनाच्या पुराभिलेख संचालनालयातर्फे आयोजित हे प्रदर्शन मुलुंडच्या महाराष्ट्र सेवा संघामध्ये भरवण्यात आले आहे. यामध्ये गांधीजी आणि शास्त्रीजी यांच्या जीवनाशी निगडीत अत्यंत दुर्मिळ आणि ऐतिहासिक कागदपत्रांचा समावेश आहे.
प्रदर्शनाचे उद्घाटन मंत्री ॲड. आशिष शेलार यांच्या हस्ते करण्यात आले. यावेळी स्थानिक आमदार मिहीर कोटेचा, पुराभिलेख संचालनालयाचे संचालक सुजीत उगले, तसेच विविध अधिकारी आणि मान्यवर उपस्थित होते.