मुंबई – राज्यातील अतिवृष्टीमुळे अनेक विद्यार्थ्यांना बारावीच्या फेब्रुवारी-मार्च २०२६ मध्ये होणाऱ्या परीक्षेसाठी अर्ज भरण्यात अडचणी निर्माण झाल्याच्या पार्श्वभूमीवर, महाराष्ट्र राज्य माध्यमिक व उच्च माध्यमिक शिक्षण मंडळाने अर्ज भरण्याच्या अंतिम तारखेत मुदतवाढ दिली आहे. नियमित विद्यार्थ्यांना आता २० ऑक्टोबर २०२५ पर्यंत नियमित शुल्कासह ऑनलाईन अर्ज भरण्याची मुभा देण्यात आली आहे.
या संदर्भात मुख्यमंत्री आणि उपमुख्यमंत्री यांनी विद्यार्थ्यांना दिलासा देण्यासाठी शालेय शिक्षण मंत्री दादाजी भुसे यांना निर्देश दिले होते. त्या अनुषंगाने मंत्री भुसे यांनी मंडळाशी चर्चा करून ही निर्णय प्रक्रिया पुढे रेटली.
नियमित विद्यार्थ्यांनी आपली आवेदनपत्रे UDISED+ मधील PEN-ID च्या आधारे संबंधित कनिष्ठ महाविद्यालय प्रमुखांमार्फत ऑनलाईन पद्धतीने भरावयाची आहेत. त्याचप्रमाणे व्यवसाय अभ्यासक्रमाचे विद्यार्थी, पुनर्परिक्षार्थी, खासगी विद्यार्थी (ज्यांनी नावनोंदणी प्रमाणपत्र मिळवले आहे), तसेच श्रेणीसुधार योजना व आयटीआयमार्फत Transfer of Credit घेणारे विद्यार्थी यांच्यासाठीही हीच प्रक्रिया लागू राहणार आहे. हे सर्व अर्ज www.mahahsscboard.in या संकेतस्थळावर भरावयाचे आहेत.
दरम्यान, फेब्रु-मार्च २०२६ मध्ये होणाऱ्या दहावी व बारावी परीक्षेसाठी खासगी विद्यार्थी नावनोंदणी अर्ज (फॉर्म क्र. १७) भरण्याची अंतिम तारीखही १५ ऑक्टोबर २०२५ पर्यंत वाढविण्यात आली आहे. तसेच नवीन परीक्षा केंद्र मान्यतेसाठीचे प्रस्ताव मंडळाकडे १० ऑक्टोबर २०२५ पर्यंत स्वीकारले जाणार आहेत, असे मंडळाकडून स्पष्ट करण्यात आले आहे.