मुंबई (प्रमोद देठे)- दिनांक २५ सप्टेंबर २०२५ रोजी “स्वच्छता ही सेवा” या अभियानाअंतर्गत मेट्रो सिनेमा ते फॅशन स्ट्रीट परिसरात लोकसहभागातून स्वच्छता मोहीम राबवण्यात आली. या मोहिमेत उपमुख्यमंत्री एकनाथ शिंदे यांनी प्रत्यक्ष सहभाग नोंदवत मुंबईकरांना स्वच्छतेचा संदेश दिला.
या प्रसंगी मुंबई महानगरपालिका आयुक्त भूषण गगराणी तसेच वरिष्ठ अधिकारी वर्ग उपस्थित होता. मंत्री मंगलप्रभात लोढा, शिवसेना नेत्या सौ. मीनाताई कांबळी, मुंबादेवी विधानसभा विभागप्रमुख रुपेश रमेश पाटील, तसेच मुंबादेवी विभागातील महिला व पुरुष पदाधिकारी यांनीही या उपक्रमात सक्रिय सहभाग घेतला.
या अभियानाची वैशिष्ट्यपूर्ण बाब म्हणजे “एक दिवस, एक तास, एक साथ” या संकल्पनेला मिळालेला प्रतिसाद. समाजातील सर्व स्तरांतील लोकांनी एकत्र येऊन परिसराची स्वच्छता करत एकतेचा आणि जबाबदारीचा संदेश दिला.
स्वच्छतेच्या माध्यमातून सामाजिक बांधिलकीची जाणीव निर्माण व्हावी आणि पर्यावरण पूरक जीवनशैलीचा अंगीकार व्हावा, हा या मोहिमेचा मुख्य उद्देश होता.
मुंबई महानगरपालिकेच्या “स्वच्छ सर्वेक्षण 2025” मध्ये अग्रस्थान मिळवण्यासाठी हे पाऊल महत्त्वाचे ठरेल, असा विश्वास सहभागी पदाधिकाऱ्यांनी व्यक्त केला.
