नाशिक – केंद्रात पंतप्रधान नरेंद्र मोदींच्या नेतृत्वाखाली कधी नव्हे ती सहकाराची निर्मिती झाली. केंद्रीय स्तरावर सहकाराला जास्त महत्व दिले जायचे नाही. परंतु पंतप्रधान मोदी यांनी केवळ खाते निर्माण केले नाही तर अमित शहा यांच्यासारखे ताकदवान नेते सहकार मंत्री म्हणून त्या खात्याचे केले. राज्यातील सहकाराला ताकद देण्याचे काम मोदींच्या माध्यमातून होतेय. राज्य सरकारही सहकाराला बळकटी देण्यासाठी प्रयत्नशील आहे. दोन्ही सरकारच्या माध्यमातून सहकारातील अडचणी सोडवून आपली व्यवस्था कशी भक्कम होईल यासाठी प्रयत्न करू. जिथेजिथे फेडरेशनसाठी सहकार्य लागेल तिथे सोबत असेन, असे प्रतिपादन भाजपा गटनेते व महाराष्ट्र राज्य सहकारी संघाचे अध्यक्ष आमदार प्रविण दरेकर यांनी केले.
दि महाराष्ट्र अर्बन को. ऑप. बॅंक्स फेडरेशन लि. मुंबईची आज ४६ वी वार्षिक सर्वसाधारण सभा व सर्वोत्कृष्ट बँक पुरस्कार २०२५ सोहळा श्री स्वामीनारायण कनव्हेन्शन सेंटर, न्यू आडगाव नाका, मुंबई आग्रा रोड, पंचवटी नाशिक येथे पार पडला. यावेळी मार्गदर्शन करताना आ. दरेकर बोलत होते. याप्रसंगी फेडरेशनचे अध्यक्ष अजय ब्रम्हेचा, उपाध्यक्षा वैशाली आव्हाडे, सत्यनारायण लोहिया, मुंबई बँकेचे संचालक संदीप घनदाट, मिलिंद काळे, सीताराम अडसूळ, मिलिंद आरोळकर, अनिल देसाई यांसह सर्व संचालक, सभासद उपस्थित होते. यावेळी महाराष्ट्र राज्य सहकारी संघाच्या अध्यक्षपदी निवड झाल्याने आ.प्रविण दरेकर यांचा फेडरेशनच्या वतीने सत्काही करण्यात आला.
यावेळी बोलताना आ. दरेकर म्हणाले कि, महाराष्ट्र राज्य सहकारी संघावर निवडून आल्यानंतर माझ्या या कुटुंबाने माझा सत्कार, सन्मान केला त्याचा फार मोठा आनंद माझ्यासारख्या कार्यकर्त्याला निश्चितपणे होतोय. आज बँकांमध्ये अनेक अडचणी आहेत. बँका चालवणे सोपे राहिलेले नाही. अडचणीतील बँकांना बाहेर काढण्यासाठी काय कष्ट घ्यावे लागतात याचा मी साक्षीदार आहे. खऱ्या अर्थाने अडचणीतील बँकांना मार्गदर्शन, दिलासा देण्याची आवश्यकता आहे. आपल्या बँक फेडरेशनच्या वतीने ज्या अडचणीतील, छोट्या बँका आहेत त्यांच्याकडे व्यक्तिशः जाऊन तज्ञांमार्फत मार्गदर्शन केले तर अडचणीत येणाऱ्या बँका बाहेर येतील किंबहुना त्या अडचणीत येणार नाहीत याचीही फेडरेशनने काळजी घ्यावी, अशी विनंती दरेकरांनी केली.
दरेकर पुढे म्हणाले कि, महाराष्ट्र राज्य सहकारी संघ १०६ वर्षांची संस्था आहे. राष्ट्रपिता महात्मा गांधी यांच्या उपस्थितीत या संघाची स्थापना झालीय. एकेकाळची शिक्षण-प्रशिक्षण देणारी ही वैभवशाली संस्था होती. परंतु त्याही संस्थेची आपल्या संस्थांसारखी परिस्थिती झालीय. महाराष्ट्राचे वैभव सहकारावर आहे. सहकाराच्या आधारावर महाराष्ट्राची अर्थव्यवस्था असेल तर या सहकाराला शिक्षण-प्रशिक्षण देणाऱ्या संस्थेच्या माध्यमातूनही सर्व सेक्टरला मार्गदर्शन झाले पाहिजे, ही भूमिका घेऊन आम्ही काम करणार आहे. येणाऱ्या सहा महिन्यात महाराष्ट्र राज्य सहकारी संघाच्या माध्यमातून सहकाराला चांगली दिशा दिली जाईल, असा विश्वासही दरेकर यांनी व्यक्त केला.