मुंबई – येणाऱ्या मुंबई महानगरपालिका सार्वत्रिक निवडणुकीच्या तयारीसाठी आज दक्षिण मुंबई भाजपा कोअर कमिटीची बैठक भाजपा मुंबई अध्यक्ष आमित साटम यांच्या अध्यक्षतेखाली पार पडली. या बैठकीस भाजपचे अनेक वरिष्ठ नेते व पदाधिकारी उपस्थित होते.
बैठकीला विधानसभा अध्यक्ष राहुल नार्वेकर, गृहनिर्माण मंत्री मंगल प्रभात लोढा, भाजप विधान परिषद गटनेते आमदार प्रवीण दरेकर, आमदार योगेश सागर, माजी खासदार गोपाळ शेट्टी, आमदार अतुल भातखळकर, आमदार मनिषा चौधरी यांच्यासह कोअर कमिटीतील इतर महत्त्वाचे सदस्य सहभागी झाले होते.
या बैठकीत महापालिका निवडणुकीसाठी प्रचाराची दिशा, कार्यकर्त्यांचे संघटन, बूथ पातळीवरील नियोजन, संभाव्य उमेदवारांची यादी, तसेच दक्षिण मुंबईतील महत्त्वाचे प्रश्न आणि मतदारांची अपेक्षा यांचा सखोल आढावा घेण्यात आला.
भाजपने या निवडणुकीसाठी संपूर्ण ताकदीने मैदानात उतरण्याची तयारी सुरू केली असल्याचे यावेळी नेत्यांनी स्पष्ट केले. भेटी दरम्यान नेत्यांनी कार्यकर्त्यांचे मनोबल वाढवणे आणि जनसंपर्क वाढवण्याचे आवाहन केले. “मुंबईच्या विकासासाठी स्थिर, पारदर्शक आणि जबाबदार प्रशासन आवश्यक आहे, आणि ते केवळ भाजपच देऊ शकतो”, असा विश्वास नेत्यांनी व्यक्त केला.
या बैठकीत घेतलेल्या निर्णयांनुसार भाजप लवकरच दक्षिण मुंबईसह संपूर्ण शहरात जनसंपर्क मोहिमेला गती देणार आहे.