घाटकोपर ता 5 , बातमीदार : गणेशोत्सव म्हटलं की मंडळांच्या भव्य मूर्ती, आकर्षक देखावे आणि नावीन्यपूर्ण कल्पनांचा जल्लोष असतो. यंदा विक्रोळी पार्क साइट येथील हनुमान नगर ‘ब’ सोसायटीमधील ॐ साई मित्र मंडळाने एक अनोखी कलाकृती सादर करून सर्वांचं लक्ष वेधून घेतलं आहे. मंडळाने तब्बल 22 हजार बटनांनी सजवलेली 7 फूट उंच गणेशमूर्ती साकारली आहे!
ही कलात्मक मूर्ती घाटकोपरचे प्रसिद्ध मूर्तिकार रोहन त्रिंबककर यांनी साकारली असून संकल्पना संतोष केळस्कर यांची आहे. ती तयार होण्यासाठी सुमारे एक महिना लागला. मूर्तीच्या निर्मितीवर सुमारे 85 हजार रुपयांचा खर्च आला आहे. विविध रंग आणि आकारांतील बटनांचा वापर करून श्रीची अत्यंत सूक्ष्म आणि नयनरम्य मूर्ती साकारण्यात आली आहे.
श्रद्धा आणि पर्यावरणाचा संगम
ही मूर्ती केवळ कलात्मकतेचा उत्कृष्ट नमुना नाही, तर ती पर्यावरणपूरक आणि संदेशपर देखील आहे. श्रद्धाळू नागरिकांचे म्हणणे आहे की, ही मूर्ती “श्रद्धा आणि सर्जनशीलता” यांचा उत्तम समन्वय साधणारी आहे.
मंडळाचा इतिहास आणि उद्देश
ॐ साई मित्र मंडळाचे अध्यक्ष हीरालाल गुप्ता यांनी सांगितले की, मंडळाची स्थापना 2004 साली झाली असून, त्यानंतर दरवर्षी मंडळाने बाप्पांची स्थापना केली आहे. “बाप्पांच्या आगमनानंतर आमच्या परिसरात सुख-शांती आणि समृद्धी वाढली आहे असे त्यांनी सांगितले.
विसर्जन मिरवणुकीचा विशेष आकर्षण
गणेशोत्सवाच्या अंतिम दिवशी श्रीचे विसर्जन मिरवणूक विक्रोळीहून पवई तलावापर्यंत जल्लोषात पार पडणार आहे. ढोल-ताशे, लेझर लाईट्स, फुलांची सजावट आणि ‘गणपती बाप्पा मोरया’च्या गजरात बाप्पांना निरोप दिला जाईल.
समाजप्रबोधनाचा सकारात्मक संदेश
मंडळाने यंदा पर्यावरण संरक्षण आणि सामाजिक जबाबदारी यावर भर दिला आहे. बटनांपासून बनवलेली ही मूर्ती हा एक प्रयोग असून, त्यातून एक महत्वाचा संदेश दिला जातो — “श्रद्धा आणि सर्जनशीलता एकत्र नांदू शकतात, आणि सण हे केवळ दिखाव्यासाठी नाहीत तर समाज जोडण्यासाठी असतात.”
प्रतिक्रिया
संतोष केळस्कर ( माजी अध्यक्ष ) : मंडळाने लहान मूर्ती आणण्याचा प्रयत्न करावा जेणेकरून विसर्जन करताना मूर्तीची विटंबना होणार नाही लहान मूर्ती सुद्धा सुबक आणि सुंदर करता येते. दरवर्षी आम्ही पर पर्यावरणाला साजेसा असा उत्सव आम्ही करत असतो.