भाईंदर, १५ सप्टेंबर – मिरा-भाईंदर महापालिकेच्या आगामी निवडणुकीच्या पार्श्वभूमीवर प्रकाशित करण्यात आलेल्या प्रभाग रचनेच्या प्रारूप आराखड्यावर नागरिक आणि राजकीय पक्षांकडून ४६ हरकती दाखल करण्यात आल्या आहेत. या हरकतींवर येत्या १७ सप्टेंबर रोजी सुनावणी होणार आहे.
राज्य सरकारने स्थानिक स्वराज्य संस्थांच्या निवडणुकांच्या अनुषंगाने महापालिकांना प्रभाग रचनेचा प्रारूप आराखडा तयार करण्याचे निर्देश दिले होते. त्यानुसार मिरा-भाईंदर महापालिकेने आराखडा तयार करून ३ सप्टेंबर रोजी तो प्रसिद्ध केला होता. हरकतींसाठी १५ सप्टेंबरपर्यंतची मुदत देण्यात आली होती.
प्रारूप आराखड्यावर दाखल झालेल्या ४६ हरकतींपैकी काही राजकीय पक्षांकडून, तर काही सामान्य नागरिकांकडून दाखल करण्यात आल्या आहेत. या हरकतींची सुनावणी उल्हासनगर महापालिकेच्या आयुक्त मनीषा आव्हाळे यांच्या अध्यक्षतेखाली होणार असून, त्या आयोगास अहवाल सादर करतील. त्यानंतर अंतिम प्रभाग आराखडा जाहीर केला जाणार आहे.
२०१७ मध्ये पार पडलेल्या महापालिका निवडणुकीत देखील अशाच प्रकारे हरकतींनंतर अंतिम आराखडा घोषित करण्यात आला होता. यंदाही आराखडा जवळपास तसाच असल्याने अनेकांनी हरकत नोंदवलेली नाही, अशी माहिती आहे.