मुंबई : बृहन्मुंबई महानगरपालिका (BMC) निवडणूक प्रभागांच्या नव्या सीमांकनाच्या मसुद्यावर हरकती व सूचना सादर करण्याचा अंतिम दिवस गुरुवार (ता. ५ सप्टेंबर) होता. या दिवशी मुंबई महापालिका प्रशासनाला एकूण ४१० अर्ज प्राप्त झाले असल्याची माहिती एका वरिष्ठ अधिकाऱ्याने दिली.
या प्रक्रियेत २०१७ मधील ६३१ अर्जांच्या तुलनेत अर्जांची संख्या कमी असल्याचे दिसून येते. त्यामुळे यंदाची प्रक्रिया तुलनेत शांततेत पार पडली असे म्हटले जात आहे. राज्य सरकारने २२ ऑगस्ट ते ४ सप्टेंबर दरम्यान प्रारूप प्रभाग रचना प्रसिद्ध करून नागरिकांकडून सूचना आणि हरकती मागवल्या होत्या.
राज्य सरकारने यंदाही २२५ प्रभागांची संख्या कायम ठेवली आहे. त्यामुळे काही प्रभागांमध्ये सूक्ष्म बदल झाले असले, तरी एकंदर प्रभागसंख्या न बदलल्याने, यापूर्वीचे सत्ताधारी पक्ष राजकीय लाभाच्या शक्यता पाहत आहेत.
प्राप्त हरकतींचे वर्गीकरण करून, ऑक्टोबरच्या पहिल्या आठवड्यात अंतिम प्रभाग रचना जाहीर केली जाणार आहे. त्यानंतर प्रभाग आरक्षणाची प्रक्रिया सुरू होईल आणि निवडणूक आयोग निवडणुकीसंदर्भात पुढील टप्प्यांची घोषणा करेल.
नवीन प्रभाग रचना जाहीर झाल्यानंतर, विविध पक्षांमध्ये इच्छुक उमेदवारांची शर्यत, संभाव्य युती चर्चा सुरू होणार आहे. २०१७ च्या प्रभागरचनेत भाजपने मोठा विजय मिळवला होता. यंदा तीच रचना कायम असल्यामुळे, भाजपा आणि शिवसेना (शिंदे गट) उत्साहात असून काँग्रेस, ठाकरे गट व राष्ट्रवादी (शरद पवार गट) तसेच मनसे पक्ष यांच्यासाठी ही एक नवी रणनीती आखण्याची वेळ आहे.