फुटबॉल सामन्यानंतर मैदानात अंधाधुंद गोळीबार, तिघे ठार, आठ जण जखमी

अमेरिकेतील मिसिसिपी राज्यात खळबळजनक घटना घडली आहे. मध्य मिसिसिपीमध्ये दोन बंदूकधारी इसमांनी जमावावर गोळीबार केला आहे. या गोळीबारात तीन जणांचा मृत्यू झाला असून आठ जण जखमी झाले आहेत. पोलिसांनी या घटनेची माहिती देताना सांगितलं की फुटबॉलच्या सामन्यानंतर ही गोळीबाराची घटना घडली आहे. सामना संपल्यानंतर बरेच जण मैदानावर जल्लोष करत होते. त्याचवेळी त्यांच्यावर हा हल्ला झाला. मिसिसिपीमधील ले क्सगटपासून तीन किमी दूर होम्स काउंटी कन्सोलिडेटेड स्कूलमध्ये ही गोळीबाराची घटना घडली आहे. होम्स काउंटीचे शेरिफ विली मार्च या घटनेची माहिती देताना म्हणाले, कार्यक्रमादरम्यान काही लोकांमध्ये मोठं भांडण झालं होतं. त्या भांडणातूनच ही गोळीबाराची घटना घडली आहे. मात्र, हे भांडण नेमकं कशामुळे झालं होतं ते आम्हाला समजलेलं नाही. २०० ते ३०० जण मैदानात जल्लोष करत होते. त्याचवेळी गोळीबाराचा आवाज आल्यानंतर सर्वजण सैरावैरा धावू लागले. या गोळीबारात तीन जणांचा मृत्यू झाला असून त्यापैकी दोघेजण १९ वर्षांचे होते. तर तिसऱ्या मृत व्यक्तीचं वय २५ वर्षे इतकं होतं. त्या कार्यक्रमाला उपस्थित असलेल्या काही लोकांनी जखमींना जवळच्या रुग्णालयात नेलं असून तिथे त्यांच्यावर उपचार चालू आहेत. आम्ही या घटनेची अधिक माहिती मिळवण्याचा प्रयत्न करत आहोत. तसेच पोलीस तपास चालू आहे.